ராஜா சபை

பொங்கல் விருந்து - " நண்பன் " வீட்டில் " வேட்டை "

2012-01-17T09:00:00.000+04:00

பரபரப்பான பணிக்கிடையில் அலைபேசியில் ஒரு பாச அழைப்பு. " டேய், நாளைக்கு மதியம் வீட்டுக்கு சாப்பிட வந்திடு. சேகர், சுந்தர்ட்ட்யும் சொல்லிட்டேன். சால்ஜாப்பு சொல்லாம வந்து சேரு." அழைத்த அன்பு நண்பனிடம் " என்னடா நாலு பரதேசிக்கு சாப்பாடு போடறதா வேண்டுதலா.. " என்று கலாய்க்க " டேய்.. நாளைக்கு பொங்கல்டா.. " என்றவுடன்தான் "ஆமாம். பொங்கல்ல... " என்பது நினைவிற்கு வந்தது. உடன் மற்ற நண்பர்களிடமும் பேசி பொங்கலன்று மதியம் நண்பன் வீடு சென்று விருந்து உண்டு பொங்கலை அருமையாக, இனிமையாக கொண்டாடினோம். படங்களும், பகிர்வும் உங்கள் பார்வைக்கு...

பொங்கலோ பொங்கல்

வண்ணம் தீட்டப்பட்ட அழகிய சிறிய மண்பானை. விலை இந்தியப்பணம் ரூபாய் நானூறாம். கேஸ் அடுப்பில் பொங்கிய பால்.

நண்பன் வீட்டு வாயிலில் அலங்கார கரும்பு வளைவும், அழகிய மாவிலை, பனை ஓலை தோரணங்களும்...

சேகர்,ராஜகோபால், நான் மற்றும் சுந்தர்

நான்தான் போட்டோ எடுப்பேன்... மடியிலிருந்து துள்ளி, துடிக்கும் நண்பன் ராஜகோபாலின் மைந்தன் ஜெய்கிஷோர்

ஜெய்கிஷோர்

வாழ்க்கையில் எத்தனை படி ஏறினாலும் இப்படித்தான் எப்போதும் இணைந்திருக்க வேண்டும்

சீனப்புத்தாண்டை வரவேற்கும் அலங்காரங்கள்

மூணு பேரும் வண்டியேறிப் போயிட்டாங்க...

தியேட்டர் வரை சென்றும், டிக்கெட் இருந்தும் நேரம் ஒத்து வராமையால் படம் பார்க்க முடியவில்லை.

நண்பன் ராஜகோபால், அவரது மனைவி சகோதரி அருள்செல்வி, குழந்தை ஜெய்கிஷோர் ஆகியோரது அன்பான உபசரிப்பு. அருமையான விருந்து. கல்லூரி காலத்திற்கே அழைத்து சென்ற கலகலப்பான உரையாடல்கள். உழைத்து, களைத்த உடலுக்கும், உள்ளத்திற்கும் உற்சாகத்தையும், உல்லாசத்தையும் ஒருங்கே தந்ததால் அடுத்து வரும் சீனப்புத்தாண்டு விடுமுறைக்கும் வித்தியாசமான இடத்தில் சந்திக்கலாம் என திட்டமிட்டுள்ளோம்.

நண்பனே… என் நண்பனே…

2011-12-14T08:18:00.000+04:00

உலகப்பந்தெங்கும்

உருண்டு கொண்டிருந்தாலும்

கண்டம் விட்டு பல கண்டம்

பறந்து கொண்டிருந்தாலும்

ஏற்றம் இறக்கம்

எத்தனை நான் கண்டாலும்...

என் நண்பனே….

வாழ்வின்

பல தருணங்களில்

நீ என்னை

வாழ்த்தும் போதெல்லாம்

வருத்தப்படவைக்கிறாய்...

நான் உன்னை எப்போதும்

வாழ்த்தியதில்லையென….

சூழ்நிலைகள் என்னை

சுற்ற விட்டிருக்கலாம்...

சுகதுக்கங்களில் நான்

சுழன்றிருக்கலாம்…

அல்லது

என் நண்பனே….

சுத்தமாக உன்னை

நான் மறந்து கூட

போயிருக்கலாம்….

எது எப்படி ஆனாலும்

என் வாழ்வில் வந்த

ஓராயிரம் உறவுகளில்

ஒன்றாய்

உன்னை நான்

நினைத்திருந்தாலும்….

நண்பனே… என் நண்பனே…

உன் உடலொட்டிய

உயிராய்தான்

என்னை நினைக்கிறாய்…

உணர்வால் நனைக்கிறாய்…

சிங்கப்பூர் சாங்கி விமானநிலையம்

2011-12-07T07:05:00.001+04:00

சிங்கப்பூர் சாங்கி விமான நிலையம் பல திரைப்படங்களிலும் பார்த்து வியந்திருக்கிறோம். பரந்து விரிந்திருந்தாலும் அதன் சுத்தமும், பராமரிப்பும், பாதுகாப்பும் உலக அளவில் பாராட்டப்படுபவை. விழாக்காலங்களில் செய்யப்படும் விதவிதமான அலங்காரங்கள் கண்ணையும், கருத்தையும் கவரக்கூடியவை.

நமது நாட்டு விமானநிலையங்களில் வழியனுப்பச் செல்பவர்கள் விமானநிலைய வாசல் வரைதான் செல்லமுடியும். உள்ளே செல்ல தனியாக கட்டணம் செலுத்தினாலும் குறிப்பிட்ட தூரம் மட்டுமே செல்ல முடியும். பயணம் செய்பவர்கள் கொண்டு சென்ற பொருட்கள் எடை சரியாக இருந்ததா, பாஸ்போர்ட், டிக்கெட் மற்றும் விசாவில் பிரச்சினையில்லாமல் குடியுரிமை சோதனை முடிந்ததா என பலவிதமான குழப்பங்களோடு வழியனுப்பச் சென்ற குடும்பத்தார் காத்திருப்பது மிகவும் கொடுமையானது. பயணம் செல்பவர்களும் எல்லா சோதனைகளும் முடிந்து உள்ளே சென்று அதிகபடசமாக இரண்டு மணி நேரம் வரையாவது வெட்டியாக, வேண்டாத யோசனைகளோடு காத்திருக்க வேண்டியிருக்கும்.

ஆனால் சிங்கப்பூரிலோ பயணம் செய்பவர்களோடு வழியனுப்பச் செல்பவர்கள் விமானம் புறப்படும் பகுதியைத் தவிர விமானநிலையம் முழுதும் எங்கு வேண்டுமானாலும் செல்லலாம். புகைப்படங்கள் எடுக்கலாம். பயணம் செய்பவர்களும் நண்பர்கள், உறவினர்களோடு கலகலப்பாக பேசிக்கொண்டே பாஸ்போர்ட், டிக்கெட், விசா குடியுரிமை சோதனைப் பகுதிகளை கடக்கலாம். எல்லா சோதனைகளும் முடிந்தபின் விமானம் புறப்படும் அறிவிப்பு வரும்வரை உணவகம் சென்று உரையாடிக் கொண்டிருக்கலாம். அடுத்தவரை தொந்திரவு செய்யாதவரை எந்த விதமான இடர்பாடும் இருக்காது.

இந்தோனேஷியாவிலிருந்து சிங்கப்பூர் வழியாக இந்தியா சென்ற பழைய நண்பர் ஒருவரை பார்ப்பதற்காக கடந்த வாரம் சாங்கி விமானநிலையத்தின் டெர்மினல் 2 சென்றபோது ஆங்கிலப்புத்தாண்டிற்காக செய்யப்பட்டிருந்த அலங்காரங்களும், வண்ண ஒளி விளக்குகளும் மிகவும் கவர்ந்தன. அப்போது எடுக்கப்பட்ட சில புகைப்படங்கள் உங்கள் பார்வைக்கு. புகைப்படங்களில் நானும், நண்பர் கணேஷும்...

மாய மான்கள்..... மயக்கும் மான்கள்

நுணுக்கமான மின் அலங்காரத்தில் உயிர் பெற்று

உயரம் துள்ளும் ஒளி மான்கள்

பகட்டான பசுமைக்குடில்... பக்கத்தில் ஒய்யார அலங்காரங்கள்....

பகட்டான பசுமைக்குடில்...

சுற்றி வந்து சுண்டி இழுக்கும் சுறா மீன் அலங்காரம்...

பளபளப்பான பலூன் அலங்காரம்...

பால் காய்ச்சும்.... பதிவர் சந்திப்பும்...

2011-11-15T08:23:00.001+04:00

திடீரென முடிவு செய்தாலும் திருப்தியாக முடிந்த புதுமனை புகுவிழாவின் சில புகைப்படங்கள் உங்கள் பார்வைக்கு...

விழா தினத்தன்று காலை வண்ண ஒளி விளக்குகள், அலங்காரப் பந்தல், பூ மாலை மற்றும் மாவிலை தோரணங்களால் அலங்கரிக்கப்பட்ட வசந்த வீடு

கணபதி ஹோமம் ஏற்பாடுகள்

பூஜை முடிந்து ஒரு சாஷ்டாங்க நமஸ்காரம்

புதுப்பானையில் தேங்காய் உடைப்பு

புதுப்பானையில் பால் விடும் ராஜாவும், பூஜாவும்

வாழ்வெல்லாம் வளம் பொங்க வாழ்த்தி பால் விடும் எனது தாயும், தந்தையும்

உற்றார்,உறவினர்களும், நண்பர்களும் விழாவிற்கு வருகை தந்து வாழ்த்த மகிழ்ச்சியுடன் இனிதே நிறைவடைந்தது.

விழாவிற்கு வரமுடியாத பதிவுலக நண்பர்கள் நேரில் சந்திக்க வேண்டுமென்று திரு.அ.ரா.சங்கரலிங்கம் மூலம் அன்பு அழைப்பு விடுக்க துணைவியாரோடு சென்று அனைவரையும் சந்தித்து வந்தேன்.

நெல்லை சந்திப்பு பேருந்து நிலையத்தில் உள்ள ஹோட்டல் ஜன்னத்தில் அருமையான சந்திப்பு.அன்றுதான் முதல்முறை சந்தித்தாலும் பலநாள் பிரிந்த உறவுகளை சந்தித்தது போன்ற உணர்வு. இரண்டரை மணி நேரம் போனதே தெரியவில்லை.

சந்திப்பில் கலந்து கொண்டவர்கள் அனைவருமே பல துறைகளில் பிரகாசிப்பவர்கள் என்றாலும் நேரம் ஒதுக்கி சந்திப்பிற்கு வருகை தந்தது மகிழ்ச்சியையும்,நெகிழ்ச்சியையும் ஒருங்கே தந்தது.

சந்திப்பில் கலந்து கொண்டு சிறப்பித்த அன்பு உள்ளங்கள்

உயர்திரு. சகாதேவன் ஐயா

திரு.ஜோதிராஜ்

திருமதி. கௌசல்யா ஜோதிராஜ்

திரு.கே.ஆர்.விஜயன்

திருமதி. ரஃபீனா ராஜ்குமார்

திரு.ஞானேந்திரன்

திரு.அ.ரா.சங்கரலிங்கம்

திரு.ராமலிங்கம்

திரு. காளிமுத்து

ஹோட்டல் ஜன்னத் அதிபர் திரு.திவான்

நான், எனது துணைவி

ஆக மொத்தம் பன்னிரெண்டு பேர்.

திரு.ராமலிங்கம், உயர்திரு. சகாதேவன் ஐயா, திரு.ஜோதிராஜ்

அன்பும்,பண்பும், பாசமும், பணிவும் நிறைந்த திரு.ஞானேந்திரன்

மேலதிகப் படங்களுக்கும், தகவல்களுக்கும் திரு.அ.ரா.சங்கரலிங்கம் மற்றும் திரு.கே.ஆர்.விஜயன் இருவர் பதிவுகளையும் பாருங்கள்.

நன்றி. வணக்கம்.

இனிய தீபாவளி நல்வாழ்த்துக்கள்.

2011-10-25T10:20:00.001+04:00

அன்பு உள்ளங்கள் அனைவருக்கும் இனிய தீபாவளி நல்வாழ்த்துக்கள்.

எகிப்தில் கொண்டாடிய தீபாவளியை ஏற்கனவே உங்களோடு பகிர்ந்துள்ளேன்.

சிங்கப்பூரில் கொண்டாடிய தீபாவளி விருந்தின் சில படங்கள் உங்கள் பார்வைக்கு....

இலை எல்லோருக்கும் போட்டாச்சா...

நம்ம வேகத்துக்கு சப்ளை இல்லையே....

நம்ம ரெண்டு பேரும் சாப்பிட்டு... சாப்பிட்டு விளையாடுவோமா....

எப்பா...பேரர்... எல்லா தட்டும் காலி...

இன்னும் ஏதாவது வருதா.....

சாப்பிட்டு முடிச்ச பிறகு குரூப் போட்டோ எடுத்தா தொப்பை தெரியாம இருக்க எப்படியெல்லாம் தம் கட்ட வேண்டியிருக்கு....

விருந்துக்கு பின் ஒரு விளையாட்டு....

விருந்துக்குப் பின் எல்லோரும் வித்தியாசமாய் போட்டோ எடுக்க இடம் தேடித் திரிய.... அம்மையப்பனே உலகம்... உலகமே அம்மையப்பன்... என ஓரமாய் கிடந்த சோபாவில் ஒய்யாரமாய் அமர்ந்து எடுத்த மங்காத்தா போஸ் படங்கள்...

இன்று இரவு சிங்கப்பூரில் இருந்து கிளம்பி திருவனந்தபுரம் வந்து நாளை தீபாவளி காலை வீட்டை அடையுமாறு பயணத்திட்டம்.

புதுமனை புகுவிழா முடிந்து நவம்பர் மாதம் 11ம் நாள் வரை திருநெல்வேலி மாவட்டம், அம்பாசமுத்திரத்தில் தான் இருப்பேன்.

நன்றி. வணக்கம்.

புதுமனை புகுவிழா அழைப்பிதழ்...

2011-10-22T09:01:00.000+04:00

அன்புடையீர்,

வணக்கம்.

நலம். நலமறிய அவா.

வீட்டைக் கட்டிப் பார். கல்யாணம் பண்ணி பார் என்பது முதுமொழி. கல்யாணம் செய்து விட்டு பெருமுயற்சியால் வீட்டைக் கட்டியுள்ளேன். தங்களையும், குடும்பத்தார், உற்றார், உறவினர், சுற்றார் அனைவரையும் நவம்பர் மாதம் இரண்டாம் நாள் புதன்கிழமை ( 02.11.2011 ) திருநெல்வேலி மாவட்டம், அம்பாசமுத்திரம் தாலுகா, விக்கிரமசிங்கபுரம் நகராட்சி, மருதம் நகரில் அடியேன் கட்டியுள்ள இல்லத்தின் புதுமனை புகுவிழாவிற்கு அழைப்பதில் பெருமகிழ்ச்சி அடைகிறேன்.

நன்றி.வணக்கம்.

அன்பன்

(துபாய்) ராஜா

குடும்பத்தார்

புகைப்படத்தில் உள்ள வீடு பழைய குற்றாலம் செல்லும் பாதையில் உள்ளது. நண்பர் பலாபட்டறை ஷங்கரோடு சென்றபோது எடுத்தது. நான் தற்போது கட்டி விழா நடக்க இருக்கும் வீடும் இதுபோன்றுதான்.

வெளிநாட்டு வேலைக்கு செல்லுபவர்களே...

2011-10-19T14:21:00.001+04:00

சிங்கப்பூர் அரசாங்க விதிமுறைப்படி மேலாளர் பணி முதல் அடிமட்ட ஊழியர் வரை பணிக்காக வரும் அனைவரும் மனிதவள மேம்பாட்டு துறையால் நடத்தப்படும் பணியிடப் பாதுகாப்பு குறித்த கட்டாய வகுப்புகளில் சேர்ந்து, படித்து, தேர்வு பெற்றால் மட்டுமே பணிக்கு சேரமுடியும். அந்த வகுப்புகளுக்கு சென்றிருந்த போது சந்தித்த பலரின் கதையும் மிக உருக்கமானது.

ஏஜெண்டுகளை நம்பி ஒன்றரை லட்சம் முதல் இரண்டு லட்சம் வரை கொடுத்து இவர்கள் வருவது இருப்பதிலே கடைமட்ட ஊழியர் பணி ஆகும். அதற்கான சம்பளம் ஒரு மணி நேரத்திற்கு அதிகபட்சமாக ஒன்று முதல் ஒன்றரை சிங்கப்பூர் டாலர் பணமாகும். எட்டு மணி நேர வேலைக்கு ஒரு நாள் சம்பளம் சராசரியாக பத்து சிங்கப்பூர் டாலர். எட்டு மணி நேரத்திற்கு மேல் செய்யும் பணிக்கு ஒன்றரை மடங்கு, விடுமுறை நாள் பணிக்கு இரண்டு மடங்கு சம்பளம் என்பதால் ஏஜெண்டுகளிடம்
கொடுத்த பணத்தை எடுப்பதற்காக உண்ணாமல், உறங்காமல் உயிரை கொடுத்து உழைப்பவர்கள் ஏராளம்.ஏராளம்.

நான் சென்ற வகுப்பு முடிந்து தேர்வு எழுதும் நேரம் வினாத்தாள் கொடுத்தவுடன் விறுவிறுவென்று விடைகளை எழுதிவிட்டு நிமிர்ந்த நான் எனது அருகில் இருந்தவர் திருதிருவென்று விழித்துக் கொண்டிருப்பது கண்டு என்ன, ஏது என்று கேட்க எழுதப்படிக்க தெரியாது என்று அவர் கூறிய பதிலால் மிக்க அதிர்ச்சியடைந்தேன். என் அதிர்ச்சிக்கு காரணம் அன்று வகுப்பில் தமிழர்கள் அதிகம் இருந்ததால் தமிழில் தான் பயிற்சி நடந்தது.வினாத்தாளும் தமிழிலேதான் இருந்தது.அன்று வந்திருந்த வகுப்பாசிரியரும் தமிழர் என்பதால் அவரை அழைத்து விபரம் கூறினேன். இதுபோன்று அன்று பலர் வந்திருப்பதாக கூறி என்னை மேலும் அதிச்சிக்குள்ளாக்கினார் அவர்.

எனது அருகிலிருந்த எழுதப்படிக்க தெரியாதவர் எங்கெங்கோ கடன் வாங்கி இந்தியப்பணம் இரண்டு லட்சம் கொடுத்து அந்த பணிக்கு வந்துள்ளார். அந்த பணத்திற்கு ஊரில் ஒரு காய்கறிக்கடையோ, டீக்கடையோ, பெட்டிக்கடையோ
வைத்திருந்தால் கூட குடும்பத்தோடு நிம்மதியாக ஊரில் காலம் கழிக்கலாம்.

உலகின் 180 நாடுகளில் மூன்று கோடிக்கு மேல் இந்தியர்கள் உள்ளனர். இதில், சுமார் இரண்டு கோடி பேர் அந்தந்த நாடுகளில் குடியுரிமை பெற்றுள்ளனர். வெளிநாடுகளுக்கு வேலை தேடி செல்பவர்கள் போலி ஏஜன்டுகளிடம் சிக்கி தவிக்கும் நிலையும், படிக்கச் செல்லும் மாணவர்கள் தொடர்ந்து தாக்குதலுக்கு உள்ளாவதும், குடியுரிமை பெற்றுள்ள இந்தியர்களுக்கு கல்வி வேலைவாய்ப்புகளில் முக்கியத்துவம் கிடைக்க போராட வேண்டிய நிலையும் தற்போது தலை தூக்கி வருகிறது.

இந்தியாவிலிருந்து சிங்கப்பூர், மலேசியா, கனடாவுக்கும், சவுதி அரேபியா, துபாய், குவைத் உட்பட வளைகுடா நாடுகளுக்கும் வேலைக்காக செல்பவர்கள், போலி ஏஜன்டுகளால் ஏமாற்றப்படுவது அதிகரித்துள்ளது. வளைகுடா நாடுகளில், பல்வேறு நகரங்களில், பல ஆயிரம் தமிழர்கள் வேலையின்றி தவிக்கும் நிலை ஏற்பட்டு, இந்திய வெளியுறவு அமைச்சகம் மற்றும் இந்திய தூதரகங்கள் மூலம் அவர்களின் நிலை விசாரிக்கப்பட்டு நடவடிக்கை மேற்கொள்ளப்பட்டு வருவதாக தகவல்கள் உள்ளன. மத்திய அரசும் அங்குள்ள இந்திய தூதரகம் மூலம் தேவையான உதவிகளை வழங்க நடவடிக்கை எடுத்து வருகிறது.

சென்ற ஆண்டு மும்பை போலி ஏஜன்டுகளை நம்பி மலேசியாவுக்கு வேலைக்கு சென்ற 80 பேர் அங்கு கொத்தடிமைகள் போல் நடத்தப்பட்டு, உயிர் பிழைத்தால் போதும் என்ற நிலையில் தமிழகம் வந்தடைந்தனர். பஞ்சாபிலிருந்து, இத்தாலி மற்றும் ஸ்பெயின் நாடுகளுக்கு வேலைக்கு சென்ற 63 பேர் ஏமாற்றப்பட்டு தாயகம் திரும்ப வழியின்றி, ஆறு வருடங்களாக வீதிகளில் தவித்ததாகவும், அதில் ஐந்து பேர் அங்கு இறந்து போனதாகவும் தகவல்கள் வெளியாகின.

வெளிநாடுகளுக்கு அரசு மூலம் அனுப்பப்படுபவர்கள் மற்றும் படித்தவர்களுக்கு அவ்வளவாக பிரச்னையில் சிக்குவதில்லை. "எல்லாரும் வெளிநாடு போய் சம்பாதிக்கின்றனர்; நாமும் போவோம்' என்று, படிக்காதவர்கள் அதிகம் சம்பாதிக்க வேண்டும் என்ற ஆசையால் அங்கு என்ன சம்பளம், என்ன வேலை, பாதுகாப்பு உத்தரவாதம் பற்றிய அடிப்படை விஷயங்களை கவனத்தில் கொள்ளாமல், போலி ஏஜன்டுகளின் கவர்ச்சிகரமான விளம்பரங்களை நம்பி, அவர்களிடம் லட்சக்கணக்கில் பணம் கொடுத்து வெளிநாடுகளுக்குச் செல்கின்றனர். போலி ஏஜன்டுகளிடம் ஏமாறாமல் இருக்கவும், வெளிநாட்டு வேலை வாய்ப்புகளில் உள்ள கஷ்ட, நஷ்டங்கள் குறித்தும், நாடு முழுவதும் மத்திய, மாநில அரசுகள் மூலம் மக்கள் மத்தியில் குறிப்பாக கிராமப்புறங்களில் விழிப்புணர்வு பிரசாரம் செய்ய வேண்டும்.

துபாய், சவுதி அரேபியா உட்பட 17 வெளிநாடுகளில் பல்வேறு பிரச்னைகளால் பாதிக்கப்படுபவர்களை மீட்க, "இந்தியர்கள் நல நிதி'க்காக மத்திய அரசு நான்கு கோடியே 80 லட்சம் ரூபாய் ஒதுக்கியுள்ளது. இத்துடன் விழிப்புணர்வு பிரசாரத்திற்கும் சேர்த்து நிதி ஒதுக்கீடு செய்யப்பட வேண்டும். விழிப்புணர்வு பிரசாரத்திற்கு தன்னார்வ தொண்டு நிறுவனங்களும், சமூக சேவை அமைப்புகளும் உறுதுணையாக இருக்க வேண்டும். ஏமாற்றும் ஏஜன்டுகளை தண்டிக்க போதுமான அளவில் தற்போதைய சட்டத்தில் இடமில்லை. ஏமாற்றும் ஏஜன்டுகளைத் தண்டிக்க, அவர்களுக்கு துணை போகும் அதிகாரிகளைத் தண்டிக்க, குடியேற்றச் சட்டத்தில் மாற்றம் செய்ய அரசு விரைந்து நடவடிக்கை எடுக்க வேண்டும். இந்தியாவிலிருந்து வெளிநாடுகளுக்கு படிக்கச் செல்லும் மாணவர்கள், அங்கு இனவெறி தாக்குதலுக்கு உள்ளாவதும் தொடர்கிறது.

முன்னர் வெளிநாடுகளுக்குச் செல்லும் இந்திய மாணவர்களில் 71 சதவீதம் பேர் அமெரிக்காவுக்கும், 8 சதவீதம் பேர் பிரிட்டனுக்கும், 7.6 சதவீதம் பேர் ஆஸ்திரேலியாவுக்கும் சென்றனர். அமெரிக்கா செல்லும் மாணவர்களின் எண்ணிக்கை தற்போது 56 சதவீதமாகக் குறைந்து, ஆஸ்திரேலியா, ஜெர்மனி, நியூசிலாந்து மற்றும் பிரிட்டன் நாடுகளுக்குச் செல்வது அதிகரித்துள்ளது. ஆஸ்திரேலியாவில் படிப்பு உதவி வசதி, படிக்கும் போதே வேலையும் தேடிக்கொள்ளும் நிலையும் உள்ளதால், இந்தியாவைச் சேர்ந்த லட்சத்திற்கும் மேலான மாணவர்கள் தற்போது அங்கு படித்து வருகின்றனர்.

இந்நிலையில், ஆஸ்திரேலியாவில் கடந்த இரண்டு ஆண்டுகளாக, இந்திய மாணவர்கள் மீது கிட்டத்தட்ட இரண்டாயிரம் தாக்குதல் சம்பவங்கள் நடந்துள்ளன. பல இடங்களில் இனவெறி தாக்குதலும் நடத்தப்பட்ட போதும் கூட, அந்நாட்டு போலீசார் உரிய நடவடிக்கை எடுக்கவில்லை. கடந்த ஜூன் மாதம் முதல் ஆகஸ்ட் மாதம் வரை இனவெறி தாக்குதலில் 30க்கும் மேற்பட்ட மாணவர்கள் பாதிக்கப்பட்டுள்ளனர் என்றும் இந்திய மாணவர்கள் தரப்பில் புகார் கூறப்பட்டுள்ளது. பிரிட்டனில் வெளிநாட்டு மாணவர்கள் படிப்பதற்காக வழங்கப்பட்ட விசாக்களுக்கான விதிமுறைகளை அந்நாடு, கடந்த ஆண்டு மார்ச் மாதம் முதல் மிகவும் கடுமையாக்கியுள்ளதால், அறுபது சதவீதம் இந்திய மாணவர்களின் விசா நிராகரிக்கப்பட்டுள்ளது.

வெளிநாடுகளில் குடியுரிமை பெற்று வாழும் இந்தியர்களுக்கு, இந்தியர்களாலேயே பிரச்னை ஏற்படும் நிலையும் தலை தூக்கியுள்ளது. மலேசியாவில் இந்துக்களுக்கு சம உரிமை கோரியும், இந்து கோவில்கள் இடிக்கப்படுவதை தடுக்கவும் அங்குள்ள இந்தியர்கள் ஒன்றிணைந்து, "இன்ட்ராப்' என்ற அமைப்பு மூலம் நான்காண்டுகளுக்கு முன் கோலாலம்பூரில் போராட்டம் நடத்தினர். இதில், 15 பேர் தேசிய பாதுகாப்பு சட்டத்தில் சிறையில் அடைக்கப்பட்டனர். 17 மாதங்கள் சிறையிலிருந்து வெளியே வந்த இன்ட்ராப் தலைவர்களின் ஒருவரான உதயகுமார், "மனித உரிமை கட்சி'யை துவங்கினார்.

"ஆளும் கட்சியும், எதிர்க்கட்சியும் இந்தியர்களின் வேலைவாய்ப்பு உள்ளிட்ட பல்வேறு குறைகளை தீர்த்து வைக்க முயற்சிக்கவில்லை. மலேசியாவில் உள்ள இந்தியர்களின் உரிமைக்காக போராடுவதே கட்சியின் வேலையாக இருக்கும்' என்று, உதயகுமார் அறிவித்தார். இது, வரவேற்கப்படக் கூடிய முடிவு என்றாலும் ஆளும் கட்சி அதிருப்தியில் உள்ளதால், இந்தியர்களின் ஒற்றுமை பலத்தை மறைமுகமாகக் குறைக்கும் நோக்கில் தனேந்திரன் தலைமையில், "மலேசிய மக்கள் சக்தி' என்ற பெயரில் புதிய கட்சியை அந்நாட்டு பிரதமர் துவங்கி வைத்துள்ளதாகவும் மக்கள் குறைபட்டுக் கொள்கின்றனர்.

பல கட்சி கூட்டணி ஆட்சி நடக்கும் மலேசியாவில், இந்தியர்கள் 20 லட்சம் பேர் உள்ளனர். இது, நாட்டின் மொத்த மக்கள் தொகையில் 8 சதவீதம். அரசியல் மூலம் தனித்து ஆட்சியைப் பிடிப்பதற்கான சாத்தியக் கூறுகள் இந்திய வம்சாவளியினருக்கு இல்லை. ஆளும் அரசை அனுசரித்தே காரியம் சாதித்துக் கொள்ள வேண்டிய நிலையே உள்ளது. எனவே, வெளிநாடுகளுக்கு பிழைக்கச் செல்பவர்கள் எப்போதும் உஷாராக இருப்பது நல்லது.

இதே கருத்து குறித்த எனது முந்தைய பதிவுகள்....

என்ன வளம் இல்லை இந்த திருநாட்டில்................

ஆயிரம் எம்.ஜி.ஆர். வந்தாலும் திருத்த முடியாது.....

புதிதாக வெளிநாட்டு வேலைக்கு செல்பவர்கள் சம்பளம், விடுமுறைகள், தங்கும் வசதி, சாப்பாடு போன்ற வசதிகள் குறித்து நன்றாக விசாரித்தறிந்த பின் வெளிநாடு செல்வது பற்றி சிந்தித்து, செயல்படுவதே சிறந்தது என்பது நான் அனுபவத்தில் கண்ட உண்மையும், அறிவுரையாகும்.

நன்றி. வணக்கம்.

வேண்டும்….வேண்டும்...

2011-10-18T08:56:00.000+04:00

பற்றற்ற வாழ்க்கைக்குபழக வேண்டும்.

முற்றற்ற நிலைக்கு முயல வேண்டும்.

குற்றற்ற சொல், செயல் புரிய வேண்டும்.

திக்கற்ற திசையெலாம் திரிய வேண்டும்.

தென்பட்ட தெய்வமெலாம் வணங்க வேண்டும்.

புண்பட்ட மனமெலாம் உதவ வேண்டும்.

கண்பட்ட மொழி, கலையெலாம் பயிலவேண்டும்

பண்பட்ட பலகுணம் பார்க்க வேண்டும்.

மானம் மறை உடை உடுத்த வேண்டும்.

ஞானம் தரும் உணவு படுத்த வேண்டும்.

ஈனமில்லா இடத்தில் உடல் கிடத்த வேண்டும்.

வேண்டும்... வேண்டும் என்ற எண்ணம்

வேண்டாம் என்ற எண்ணம் வேண்டும்.

இறந்த காலம் எளிதாய் கடந்துவிட்டோம்.

வரும்காலம் வருத்தமின்றி வாழவேண்டும்

நிகழ்காலம் நேர்மையாய் நாம் நடந்து கொண்டால்....

பள்ளி பருவத்திலே…..

2011-10-15T10:24:00.000+04:00

எல்லோருடைய வாழ்க்கையிலும்மாணவப்பருவம் என்பது படிப்பைத் தவிர எந்த ஒரு கவலையும் இல்லாத காலகட்டம் ஆகும். அடிப்படைவசதி இல்லாத ஏதோ ஒரு கிராமத்தின் ஆரம்பப்பள்ளி என்றாலும், அமெரிக்க பல்கலைகழகத்தில்ஆராய்ச்சிப் படிப்பு என்றாலும் குறும்பும், குதூகலமே கூடி இருக்கும்.

பொதுவாக பல மாணவர்களும்,ஆசிரியர்களும் பாடப்புத்தகத்தில் என்ன கொடுத்துள்ளதோ அதை மட்டுமே மனப்பாடமாக படித்தும்,நடத்தியும்விடுவர். ஆனால் சில ஆசிரியர்களும், மாணவர்களும் மட்டுமே பாடத்தை விட்டு வெளியேயும்,அல்லது பாடத்தையே வேறு கோணத்திலும் சிந்தித்து செயல்படுத்த முனைவர். அதனால் முந்திரிக்கொட்டை,அதிகப்பிரசங்கி என்ற பட்டப்பெயர்களோடு அவர்கள் சந்திக்கும் பிரச்சினைகளும், அடக்குமுறைகளும்ஆயிரமாயிரம்…. அப்படிப்பட்ட மாணவர்களைப் பற்றிய சில சுவாரசியப் பகிர்வுகளின் தொகுப்பேஇந்த பதிவு.

மாநிலமெங்கும்உள்ள அரசு பள்ளிகள், தனியார் பள்ளிகளின் அடிப்படை வசதிகள், ஆசிரியர்களின் அணுகுமுறை, பயிற்றுவிப்பு முறை, மாணவர்களின் புரியும்திறமை , ஆகியவற்றை சோதிப்பதற்காக மாநில அரசின் கல்வித்துறையின் மாவட்ட கல்வி அலுவலர்கள் ( DEO – District Education Officer ) மூலம் அவ்வப்போது தணிக்கைஆய்வுகள் நடத்தப்படுவது நாம் அனைவரும் அறிந்ததே.

அவ்வாறான ஆய்விற்கு DEO வருவதை அறிந்தது முதல் ஆய்வு முடிந்து செல்லும்வரை சம்பந்தப்பட்டபள்ளி முழுதுமே ஒரு அசாதரண, பரபரப்பான சூழ்நிலை தொற்றிக்கொள்ளும். பள்ளி கட்டிட பராமரிப்பு,வெள்ளையடிப்பது, மற்றும் பல மராமத்து பணிகளில் நிர்வாக அலுவலர்களும், மாணவர்களை தயார்படுத்துதல்,பல்வேறு பாட சம்பந்தமான குறிப்புகள், படங்கள் தயார் செய்து வகுப்பறை முழுதும் ஒட்டி அழகு செய்தல்என ஆசிரியர்களும் முழுவீச்சில் முயற்சிப்பார்கள். இந்த முயற்சிகளிலெல்லாம் சிக்கி,சின்னாபின்னாமாவது மாணவர்களே.

இப்படித்தான் ஒருஆரம்பப்பள்ளியிலும் DEO ஆய்விற்காக மாணவர்களை தயார் செய்த ஆசிரியர்ஆங்கிலப்பாடத்தை “ ஏ ஃபார் ஆப்பிள் “ , “ பி ஃபார் பிஸ்கட் “ , “ சி ஃபார் சாக்லெட்“ …. என்று சொல்லிக் கொடுத்து சரியாக பதில்சொன்னவர்களுக்கு பரிசாக ஆப்பிள், பிஸ்கட், சாக்லேட் போன்றவற்றை கொடுத்து ஊக்கப்படுத்தியிருந்தார்.

ஆய்வு தினமும் வந்தது. ஆசிரியரும், மாணவர்களும் , தனித்தனி தட்டுகளில் ஆப்பிள்களும்,பிஸ்கட்டுகளும், சாக்லேட்டுகளும் தயாராயிருக்க மாவட்டக் கல்வி அதிகாரியும் வகுப்பினுள் வந்தார்.

ஆசிரியரிடமும்,மாணவர்களிடமும் வழமையாக பேசிவிட்டு ஆங்கிலப்பாடத்திலிருந்து கேள்வி கேட்க ஆரம்பித்தார்.“ ஏ ஃபார் …. “ என ஒரு மாணவனைப் பார்த்து கேட்க அவன் “ ஆப்பிள் “ என கூறவும் ஆசிரியர்பெருமிதத்துடன் DEO கையாலே அந்த மாணவனுக்கு ஒரு ஆப்பிள் பரிசளிக்கச் செய்தார்.

அடுத்த மாணவனைப்பார்த்து “ பி ஃபார்….. “ என கேட்க அந்த மாணவன்பதில் சொல்லாமல் நிற்பதை கண்ட DEO சரியாக காதில் விழவில்லையோ என்றெண்ணி, சிறிது சத்தமாக“ பி ஃபார்….. “ என்று கேட்டார். அந்த மாணவனோ இன்னும் தீவிரமாய் யோசிக்க ஆரம்பிக்கவும்,“ இதுதானா நீ பாடம் சொல்லிக்கொடுத்த லட்சணம் “ என்பது போல் DEO ஆசிரியரைப் பார்க்க ஆசிரியர் மாணவனை நாக்கை துருத்திக் கொண்டுமிரட்ட கொஞ்சமும் அசராத மாணவன் “ பி ஃபார்….. “, “ பி ஃபார்….. “ என்று இரண்டு முறையோசனையோடு கூறி மூன்றாவது முறை முகமலர்ச்சியுடன்,பதில் கிடைத்த சந்தோஷத்தில் “ பி ஃபார்….. ஃபிக் ஆப்பிள் “. ( Big Apple ) என்று சத்தமாகச் சொன்னான்.

ஆம்… பிஸ்கட்டும்,சாக்லேட்டும் அவ்வப்போது சாப்பிட்ட அவனுக்கு ஆப்பிள்தான் அரிதான பொருள். அதனால்தான்பெரிய ஆப்பிளாக கேட்டான். அவனது சாமர்த்தியமான பதிலைக் கேட்டு சத்தமாக சிரித்த DEO அவனது கையில் இரண்டு ஆப்பிள்களை தூக்கி கொடுத்து ஆசிரியரையும்பாராட்டி சென்றார்.

இன்னொரு பள்ளி,இன்னொரு ஆய்வு, இன்னொரு DEO, மாணவர்களிடம் சில படங்களை காண்பித்து அது என்ன என்று கேட்டு கொண்டிருந்தார்.

மாணவர்களும் வாழைப்பழம், மாமரம், ஆடு, மாடு,மணி, மணல் , சணல் அணில்… என்று போட்டி போட்டுக் கொண்டு பதில்கள் சொல்லிக் கொண்டிருந்தனர். இப்படியாக பலரிடம் கேட்டுபதில் பெற்றுக் கொண்டிருந்தவர் ஒரு மாணவன் மட்டும் மற்றவர்கள் பதில் சொல்லும் போதெல்லாம்உற்றுக்கவனித்து திருப்தி இல்லாத பாணியில் முகத்தை சுழித்துக் கொண்டிருப்பதை கண்டுஅவனிடம் ஒரு படத்தை காண்பித்து கேட்க அவன் மிக தெளிவான முகத்துடன் “ யானையின் படம்“ என்றான்.

மேலும் அவனிடம்அடுத்தடுத்து படங்களை காண்பித்து பதில் கேட்க அவன் அசராமல் வாழைப்பழத்தின் படம், மாமரத்தின் படம், ஆட்டின் படம்,மாட்டின் படம், மணியின் படம் என்று தெளிவான குரலில் வரிசையாக சொன்னான். இப்போதுதான் DEO விற்கு அந்த மாணவன் முகம் சுழித்த காரணம்புரிந்தது. ஆம் மற்ற மாணவர்கள் படத்தை படமாக பார்க்காமல் அதில் உள்ளதை உள்ளபடி உருவகப்படுத்திசொன்னார்கள். இந்த மாணவன் மட்டுமே அவை யாவும் படம் என்ற உண்மையை உணர்ந்து பதில் சொன்னான்.

அவன் அதிகப்பிரசங்கித்தனமாகபேசியதாக எண்ணாத DEO வும் அவனை வியந்து பாராட்டி சென்றார்.

மற்றுமொரு நடுநிலைப் பள்ளியில் நடந்த சுவாரசியமான சம்பவம்.பள்ளி தலைமையாசிரியர், கரெஸ்பாண்டட் புடைசூழ ஒரு வகுப்பினுள் நுழைந்த DEO மாணவர்களின் பொது அறிவுத்திறனை சோதிக்கும் விதமாக “ இராமாயணத்தில் இருந்து கேள்வி கேட்கப்போகிறேன்“ என்று கூறி ஒரு மாணவனை நோக்கி “ ஜனகனின் வில்லை உடைத்தது யார் “ என்று கேட்டார்.

அவரது திடீர் கேள்வியால் அதிர்ச்சியடைந்த மாணவன் ஏதோ ஒரு ஞாபகத்தில் “ நான் இல்லை சார்“ என்றான். அவனது பதிலால் துணுக்குற்ற DEO இன்னொரு மாணவனை எழுப்பி அதே கேள்வியை கேட்க “ ஆமாம் சார். அவன் உடைக்கலை சார் “. என்று அவன்கூற வகுப்பிலிருந்த அனைவரையும் வரிசையாக எழுப்பி கேட்டபோதும் எல்லோரும் இதே பதிலை சொல்லகுழப்பமடைந்த DEO வகுப்பாசிரியரைப் பார்க்க அவரும், “ ஆமாம்சார். பசங்க சொல்றது சரிதான். அந்த வில்லை அவன் உடைக்கலை சார் “ என்றார்.

இப்போது கொஞ்சம்கோபமடைந்த DEO தலைமையாசிரியரைப் பார்க்க, அவரும், “ ஆமாம்சார். அப்படி சேட்டை பண்ற பசங்க யாரும் நம்மபள்ளியிலே கிடையாது சார். “ என்றார். DEO மேலும் கோபமாகி முகம் சிவந்து நிற்பதை கண்டகரெஸ்பாண்டன்ட் அவரை தனியே அழைத்துச் சென்று, “ சார். வேணும்ன்னா அந்த உடைந்த வில்லுக்குண்டானபணத்தை பள்ளி நிர்வாகத்திலிருந்து கொடுத்து விடுகிறோம். பெரிய மனது பண்ணி இந்த பிரச்சினையை மேலும் பெரிதாக்காமல் இத்தோடு விட்டுவிட்டால்ரொம்ப புண்ணியமாப் போகும் “ என்று கெஞ்சிய குரலில் கேட்க மயக்கமடைந்து விழுந்தார் அந்தDEO.

செய்நன்றியில் சிறந்தவர் கர்ணனா…. கும்பகர்ணனா….

2011-10-13T12:03:00.000+04:00

அறை நண்பரோடு ஏதோ ஒரு புள்ளியில் ஆரம்பித்து, என்னவெல்லாமோ பேசி கடைசியில் நின்ற இடம்தான் பதிவின் தலைப்பு. உங்களின் பார்வைக்கும் அந்த பகிர்வு.

செய்நன்றியில் சிறந்தவர் கர்ணனா…. கும்பகர்ணனா….

செய்நன்றியில் சிறந்தவர் கர்ணனா…. கும்பகர்ணனா…. – இது என்ன கேள்வி கும்பகர்ணன் அண்ணனுக்காக சண்டை போட்டு மாண்டதில் என்ன சிறப்பு… கர்ணன்தான் பாண்டவர்கள் தம் சகோதரர்கள் என்று தெரிந்தும் செஞ்சோற்றுக்கடன் தீர்க்க இறுதிவரை துஷ்டன் துரியோதனனுக்காக போராடி உயிர்நீத்தான் என்பதுதான் எல்லோருடைய கருத்தாகவும் இருக்கும்.

இனி விவாதத்திற்கு வருவோம்.

கர்ணன் : கன்னிப் பெண் குந்தி தேவிக்கும், சூரிய தேவனுக்கும் பிறந்து ஆற்றில் விடப்பட்டு, தேரோட்டியால் வளர்க்கப்பட்டு, வில்வித்தை கற்றுத்தேர்ந்து போட்டியொன்றில் அர்ஜுனனோடு மோதவரும்போது துரோணச்சாரியால் இழிகுலத்தான் என அவமானப்படுத்தப்பட்டவன். அந்த நேரம் துரியோதனன் எழுந்து அர்ஜுனனை விட திறமைசாலி என்பதால் கர்ணனின் வில்திறமைக்காக அவனை அங்கதேச அதிபதியாக்கி தன்னுடன் சேர்த்துக்கொண்டு எடுக்கவோ… கோர்க்கவோ… என்ற அளவில் நட்பு கொண்டான். நட்பிற்கு நன்றியாக தன் உடல், பொருள்,ஆவி அனைத்தும் துரியோதனனுக்கு அர்ப்பணம் என்று உறுதிமொழி கூறியவன் கர்ணன்.

குற்றம் 1 : இந்திரன் தன் மகன் அர்ஜுனனுக்காக கர்ணனது கவச,குண்டலத்தை தானமாக கேட்டபோது அறுத்துக் கொடுத்த கர்ணன் அவனது உடல், பொருள், ஆவிக்கு சொந்தக்காரனான துரியோதனனிடம் அனுமதி பெறாதது ஏன்…

குற்றம் 2 : உண்மையான நட்பிற்கும், உறவிற்கும் அழகு தவறு செய்யும்போது இடித்துரைப்பது… சூதாட்டத்தில் பாஞ்சாலியையும் தர்மர் வைத்து தோற்றவுடன் அவளை அவைக்கு இழுத்து வந்து துச்சாதனன் அவமானப்படுத்தும்போது ஆட்சேபிக்காததும்…. அந்த அநியாயத்தை தட்டிக்கேட்டு, தடுக்க முயன்ற கௌரவர்களில் கடைசியானவனான விகர்ணனை பெரியவர்களை எதிர்த்து பேசக்கூடாது என்று திட்டி சபையை விட்டு வெளியே அனுப்பியதும் நியாயமா…

குற்றம் 3 : கண்ணன் மூலம் கர்ணன் தன் மகன் என அறிந்த குந்தி தேவி அவனை பாண்டவர்களோடு வந்து சேர்ந்து கொள்ளுமாறு அழைக்கும்போது செஞ்சோற்றுக்கடன் கூறி மறுத்த கர்ணன், அர்ஜுனனை தவிர மற்ற பாண்டவர்களை கொல்லமாட்டேன் என்றும், அர்ஜூனன் மீது ஒரு முறை மட்டும்தான் கொடிய நாகபாணம் பிரயோகிப்பேன் என்றும் துரியோதனனிடம் அனுமதி பெறாமல் உறுதிமொழி கொடுத்தது சரியா… தவறா…

குற்றம் 4 : யுத்த தர்மபடி களத்தில் ஆயுதமின்றி நிற்கும் எவரையும் தாக்கக்கூடாது…. ஆனால் நிராயுதபாணியாக நின்ற அபிமன்யுவை அம்பு விட்டு கொன்றது யுத்ததர்மமா…..

குற்றம் 5 : அர்ஜூனனை அழிக்க நாகபாணம் விடும்பொழுது நெஞ்சுக்கு குறிவக்குமாறு பலகளம் கண்ட அனுபவசாலியான தேரோட்டிய சல்லியன் கூறியும் கேட்காமல் தலைக்கு குறிவைக்க கண்ணன் தன் காலால் தேரை ஒரு அடி கீழே அழுத்தி அர்ஜுனனை காப்பாற்றினான். அதனால் கடும்கோபம் கொண்ட கர்ணன், நிலத்தில் அழுந்திய தேரை தூக்க முயற்சித்துக் கொண்டிருந்த சாரதியும், பாரதப் போரில் ஆயுதம் தூக்கமாட்டேன் என சத்தியம் செய்திருந்தவனுமாகிய கண்ணனை அம்பால் அடித்து துன்புறுத்தினான். இச்சம்பவத்தையும், அபிமன்யுவை கொன்றதையும் கூறித்தான் நிராயுதபாணியான கர்ணனை கொல்ல மறுத்த அர்ஜுனனின் மனதை மாற்றினான் கண்ணன்.

குற்றம் 6 : கர்ணன் உயிர்பறிக்க அர்ஜூனன் விடும் அம்புகளெல்லாம் தர்மதேவதையால் மாலைகளாக மாறுவதை கண்ட கண்ணன் வயோதிக அந்தணர் உருவம் எடுத்து கர்ணன் செய்த தர்மத்தையெல்லாம் தானமாக கேட்க, அவனும் ரத்தத்தில் தாரை வார்த்து கொடுத்தான்.நெகிழ்ச்சியுற்ற கண்ணன் என்ன வரம் வேண்டுமென்றாலும் கேட்க சொல்ல ஈரேழு உலகம் இருக்கும் வரை கொடைவள்ளல் என்ற பட்டம் மட்டும் போதும் என்று கூறியதற்கு பதிலாக தன் நண்பன் துரியோதனன் போரில் வெல்ல வேண்டும் என்று கேட்டிருக்கலாமே….

குற்றம் 7 : இடது கை கொடுப்பது வலது கைக்கு தெரியாது என்று எல்லோரும் சொல்ல வேண்டும் என்பதற்காக வாரி, வாரி வழங்கிய கர்ணன் அந்த பொன்னும்,பொருளும் துரியோதனன் கொடுத்ததே என்பததை எப்போதும் மனதில் கொண்டும், எல்லோரிடமும் சொல்லியும் அந்த புகழெல்லாம் துரியோதனனுக்கு கிடைக்கும்படி செய்திருக்கலாம் அல்லவா….

கும்பகர்ணன் : இராவணனின் தம்பி. மிகுந்த பலம் வாய்ந்தவன். தூக்கத்தில் ஆழ்ந்தால் ஆறுமாதத்திற்கு ஒருமுறைதான் விழிப்பான்.

அப்படியொரு நாள் விழித்திருக்கும்போது தான் இராவணன் சீதையை கவர்ந்து வந்தான். உடனே அச்செயலை கண்டித்த கும்பகர்ணன் சீதையை திருப்பி கொண்டுபோய் விட்டுவிடுமாறு அறிவுரை கூறி விட்டு தூங்கச் சென்று விட்டான்.

சீதை இராவணனால் கடத்தப்பட்டு இலங்கையில் சிறை வைக்கப்பட்டு இருப்பதை அறிந்த இராமன் வானரப்படை திரட்டி வந்து நடத்திய போரில் இந்திரஜித் மற்றும் முக்கிய தளபதிகள் மடிந்தவுடன் தூங்கிக் கொண்டிருந்த கும்பகர்ணனை எழுப்பச் சொன்னான் இராவணன்.

கடும்போராட்டத்திற்குபின் உறக்கத்தில் இருந்து எழுப்பப்பட்ட கும்பகர்ணன் விவரங்கள் அறிந்து இராவணனிடம் சென்று, “ உன்னை அன்றே சீதையை கொண்டு விடச்சொன்னேனே…. அப்படிச் செய்திருந்தால் இந்த தேவையில்லாத போரே வந்திருக்காதே… இந்திரஜித் போன்ற ஒப்பிலா வீரர்களையே அழித்தவன் என்றால் அவனது பலம் இன்னும் புரியவில்லையா… இப்போதாவது மன்னிப்பு கேட்டு சீதையை இராமனிடம் ஒப்படைத்து விட்டு உயிர்பிழைக்கும் வழிபார் ”. என்று அறிவுரை கூறினான்.அதற்கு இராவணன் எனக்காக போரிட்டு மடியும் அளவு பாசம் கொண்ட மகன்களையும்,நண்பர்களையும் பெற்றும் உன்னையும், விபீஷணனையும் போன்ற துரோகிகளை தம்பிகளாக அடைந்ததற்காக வெட்கப்படுகிறேன் . வேதனைப்படுகிறேன் என்று கூறவும் உனது நன்மைக்காகவும், மீதியிருக்கும் நமது குலம் காக்கப்படவேண்டும் என்பதற்காகவும்தான் உன்னை திருந்தச்சொன்னேன். விதியை யாரால் வெல்ல முடியும். என்று கூறி கும்பகர்ணன் போருக்கு புறப்பட்டு சென்றான்.

கும்பகர்ணன் களத்தில் இறங்கி வானரப்படைகளை துவம்சம் செய்வதை கண்டு திகைத்த இராமன் யார் இந்த இராட்சதன் என விபீஷணனிடம் கேட்டு விவரம் அறிந்தான்.

இனியும் இவனை விட்டு வைத்தால் வானரப்படையை கூண்டோடு அழித்துவிடுவான் என்பதால் அம்பு விட்டு கும்பகர்ணனின் இரு கைகளையும் அறுத்தும் அங்கும், இங்கும் ஓடி அகப்பட்டவர்களை கால்களால் மிதித்து அழிப்பதை கண்ட இராமன் இரு கால்களையும் அறுத்தான்.

சகோதர பாசத்தால் பீடிக்கப்பட்டு மிகுந்த மனவருத்தத்துடன் மாமிசமலை போல் களத்தில் விழுந்து கிடந்த கும்பகர்ணனின் அருகில் சென்ற விபீஷணன் அவனது கண்களில் இருந்து தாரை, தாரையாக கண்ணீர் வடிவதை கண்டு மேலும் கலங்கி காரணம் கேட்க “ மிகுந்த பலசாலியும்,பெரும் உடலும் கொண்ட என்னையே இராமனது பாணங்கள் சிதைத்து சின்னாபின்னப் படுத்தி விட்டனவே..என்னை விட நூறு மடங்கு உருவத்தில் சிறிய இராவணன் மீது இந்த பாணங்கள் பட்டால் அவன் எவ்வளவு வலியும், வேதனையும் அடைவான் என்பதை நினைத்தே என் கண்கள் கலங்குகின்றன ” என்று கூறியவாறே உயிர் நீத்தான் கும்பகர்ணன்.

உங்களது கருத்துக்களையும்கூறுங்கள்….

செய்நன்றியில்சிறந்தவர் கர்ணனா…. கும்பகர்ணனா….

அன்பே... என் அன்பே...

2011-10-10T08:49:00.001+04:00

உயிர்ப்பறவை

உடலை

விட்டுச்செல்லும்

நேரம்...

அன்பே...

என் அன்பே...

உன்

நினைவுகளோடுதான்

என்

அஸ்தமனம்

நேரும்...

உறவென்று

சொல்லிட

உலகில்

பலருண்டு...

உடலொட்டிய

உயிர்

ஒன்றே ஒன்று...

அன்பே...

என் அன்பே...

உரக்கச்

சொல்வேன்

அது

நீயே என்று...

பணிக்காக

பறந்தேன்

பல நாடு...

அன்பே...

என் அன்பே...

காதல்பிணி

தீர

எப்போதும்

இருப்பேன்

இனி

நான்

உன்னோடு...

பயணம்...

2011-10-04T14:36:00.000+04:00

ஓரூரில் பிறந்து

ஈரூரில் வளர்ந்து

மூவூரில் படித்து

நாலூரில் முடித்து

ஐந்தூரில் பணிபார்த்து

ஆறூரில் குடியமைத்து

ஏழூரில் எல்லாம் இருக்க

எட்டாத ஊர் செல்லும்வரை

இன்னும் எததனை

ஊர் வழிப்பயணம் எமக்கு......

காரணம் என்னடி...

2011-10-01T07:05:00.002+04:00

கட்டி அணைத்து

முத்தம் கொடுத்தால்

கன்னங்கள் சிவக்கும்

சரிதான்....

ஆனால்

எட்டி நின்று

ரசிக்கும்போது கூட

நித்தம்

உன் கன்னங்கள்

சிவப்பதன்

காரணம் என்னடி...

------------------------

மோதலின் போது

ஒரு கன்னத்தில்

அறைந்தால்

மறுகன்னத்தை காட்டு

தத்துவம் சொல்லும் நீ.....

மிகுந்த காதலின்போது

உன்னொரு கன்னத்தில்

முத்தமிட்டால்

மறுகன்னம் காட்ட

மறுப்பதன்

காரணம் என்னடி...

காதல் காலம்

2011-09-27T10:27:00.000+04:00

தை, மாசி

கன்னியவள்

தைத்திட்டாள்

என் மனதில்

கதை

பல பேசி...

பங்குனி, சித்திரை

பந்தம் கொண்டவள்

படுத்திய பாட்டில்

பங்கம் கண்டது

என் நித்திரை.....

வைகாசி, ஆனி

எங்கள் காதல்

ஏறியது இனிதே

பல ஏணி....

ஆடி, ஆவணி

இணைந்தே

பாடிட்டார்

இருவீட்டாரும்

எதிர்லாவணி....

புரட்டாசி, ஐப்பசி

புதுவாழ்வில்

இறங்கிட்டோம்

புறந்தள்ளி

பல சதி.....

கார்த்திகை, மார்கழி

காதல் களியில்

புது உறவொன்று

உருவாக

இனி

எங்கள் வாழ்வில்

தினம், தினம்

தீபாவளி.

கண்டவர் விண்டிலர்….

2011-09-24T09:38:00.000+04:00

அனுநித்தம் கனவில்வந்திட்ட

அழகுமுத்தம் பலதந்திட்ட

கனதினம் பிரிந்திட்ட

காதலி தொலைவில்வந்திட

கண்கள் நோக்கிட

காதல் பெருக்கிட

இதயநீர் இளகிட

இமைகள் நனைந்திட

உதடுகள் ஒட்டிட

உள்நாக்கு உலர்ந்திட

கட்டி அணைத்திட

கைகள் துடித்திட

கண்ணியம் தடுத்திட

அருகே அழைத்திட

அவள் பெயரும் மறந்திட

ஏதேதோ என்னுள்நடந்திட

உலகமொழியெலாம்

ஒரு வார்த்தை இல்லை

தன்நிலை மறந்திட்ட

என்நிலை விளக்கிட….

தமிழா…..தமிழா

2011-09-20T11:06:00.000+04:00

ஓட்டு வீடு,

ஓலைக்குடிசையில்

தூசி,தும்பு

மண், மட்டி

ஒட்டி விழும்

மழைத்தண்ணீர்

வேட்டித்துணியில்

வடிக்கட்டி

தவலையில் பிடித்து

தவணையில் குடித்து

வளர்ந்தோம்

அப்போது…..

தண்டா பானி

மினரல் வாட்டர்

பிராண்ட் மாறி

குடித்தால்

த்ரோட் இன்வக்சன்

சளி, கபம்,காய்ச்சல்

ரூபாய் தொள்ளாயிரம்

செலவு

நாளொன்றிற்கு

இப்போது…..

தாய் நீ(ர்) தாய்...

2011-09-18T12:33:00.000+04:00

ஊற்றுச் சேய்

ஓடைக் குழந்தை

அருவிக் குமரி

ஆற்று மங்கை

அலைகடல் பெண்....

சூரியக் கணவன்

சுடுகதிர் பட்டு

நீராவிக் கர்ப்பம்

நீ தரித்து....

நெடுமழையாய்

பிரசவித்தாய்

நீர்சூழ்

பிரபஞ்சத்தில்.....

கவிஞனின் கவலை...

2011-09-16T10:01:00.001+04:00

கடந்து செல்லும்

ஒவ்வொரு முகங்களும்

எனக்கொரு கதை

சொல்லுகின்றன.

என் கதை

எழுதவே

நேரமில்லையே....

எப்போது எழுதுவேன்

எல்லோர் கதைகளையும்

நான்....

ராஜா மகள் பூஜா - பிறந்த நாள்

2011-09-14T07:20:00.000+04:00

ராஜா மகள் பூஜா

இந்த ராஜாவின் குட்டி இளவரசி சிவ பூஜாவிற்கு இன்று பிறந்த நாள்.

நான்கு வயது முடிந்து ஐந்தாவது தொடங்குகிறது.

அன்புமகள் சிவபூஜா இன்றுபோல் என்றும் மகிழ்ச்சியாய் வாழ

இனிய பிறந்தநாள் வாழ்த்துக்கள்.

வெறுமை

2011-09-12T10:18:00.000+04:00

ஏதோ ஒரு

பயணத்தின்

இடையில்

காத்திருக்கும்போது

கடக்க மறுப்பது

நேரம் மட்டுமல்ல

நினைவுகளும் தான்......

வசியக்காரி...

2011-09-10T11:21:00.000+04:00

பேய்க்கதைகளை

கேட்டு

பீதியடையாத

நான்.....

உன்

வாய்க்கதைகளை

கேட்டு

வசமிழந்து போகிறேன்.

காதல் தந்திரம்

2011-09-06T09:00:00.000+04:00

ஏழு கடல், ஏழு மலை தாண்டி

ஏதோ ஒரு குகையில்

எந்திரக்கிளியிடம்

ஒளிந்திருக்குமாம்

மந்திரவாதியின் உயிர் .

படித்திருக்கிறேன்

பாலவயதில்......

பலகடல் தாண்டி

பணிக்காக பறந்தபோது

காதல் மந்திரக்கிளி

உன்னிடம் தந்திரமாக

என்னுயிர் ஒட்டிக்கொள்ள....

துடித்திருக்கிறேன்

பருவவயதில்.....

தத்தை உன் வித்தை

2011-08-22T18:16:00.005+04:00

கூடு விட்டு

கூடு பாயும்

வித்தையை

ஏடுகளில்

படித்த பொழுது

எக்களித்த

என்மனம்

ஓடி வந்து

ஒட்டிக் கொண்டது

உன்னைக்
கண்டவுடன் ........

புதிய வானம்..... புதிய பூமி.....

2011-08-15T17:47:00.009+04:00

அன்பு நண்பர்களுக்கு வணக்கம்.

இனிய சுதந்திர தின வாழ்த்துக்கள்.

நீண்ட இடைவெளிக்குப் பின் உங்களை சந்திக்க வந்துள்ளேன்.

இப்போது
   புதிய நாடு....
      புதிய வாழ்க்கை...
     புதிய பயணங்கள்......
       புதிய அனுபவங்கள்......

இனி தொடர்ந்து கதைகள் , கவிதைகள்

போன்ற பல்சுவை பதிவுகளோடும், பலவிதமான அனுபவப்பகிர்வுகளோடும்

வலையுலகில் வளைய வரலாம் என உள்ளேன்.

உங்கள் மேலான அன்பும்,

ஆதரவும் வேண்டி

அன்பு நண்பன்

(துபாய்) ராஜா.

நீண்ண்ண்ண்ண்ண்ண்ட விடுமுறை

2010-04-21T22:25:00.005+04:00

அன்பு நண்பர்களுக்கு வணக்கம். கால, நேரம் பார்க்காமல் திட்டம் முடியும் வரை கடுமையாக உழைக்க வேண்டிய துறை கட்டுமானத் (Construction)துறையாகும் .என்னதான் நான்கு மாதத்திற்கு ஒரு முறை ஊருக்கு சென்று வந்தாலும் முழுமையாக பணி நிறைவடைந்து ஒரு மனத்திருப்தியோடு சென்றால்தான் விடுமுறையை முழுமையாக அனுபவிக்க முடியும். ஒன்றரை வருட கடும்பணிக்கு பின் ஒரு நீண்ட ஓய்வு கிடைத்துள்ளது. குறைந்தது இரண்டு முதல் மூன்று மாதங்கள் வரை ஊரில் இருக்கலாம் என எண்ணம். ஊரில் இருக்கும் நேரம் வலையுலகம் பக்கம் வரமாட்டேன். எனவே வலைப்பூவிற்கு வருகை தரும் நண்பர்கள் எனது அனைத்து பல்சுவைப் பதிவுகளையும், பகிர்வுகளையும் படித்து ரசித்து மகிழ வேண்டுகிறேன்.

ஒரு இனிய காதல் தொடர்கதை

ஏதோ மோகம்

சில குளிர்ச்சியான கவிதைகள்

அ

ஆ

இ

ஈ

உ

பயணப்பதிவுகள்

ஒரு வரலாற்றுப் பயணம்

சூயஸ் கால்வாய்

விமான பயணத்தில்...

கொல்லம் மெயில்

விறுவிறுப்பான திகில் கதைகள்

1. மோகினியைக் கண்டேன்...

2. முறுக்கு முனி..

3. சந்திரமுகியை சந்தித்தேன்..

4. குழியில் தள்ளிய குட்டிச்சாத்தான்

மேலும் பல சுவாரசியமான பதிவுகளுக்கும், பகிர்வுகளுக்கும் வலைப்பூவின் வலதுபக்கம் உள்ள மாதம் வாரியாக உள்ள பெட்டகத்தை திறந்து பார்த்து, படித்து மகிழுங்கள்.

நாளை (23.04.10 - வெள்ளி) எகிப்திலிருந்து கிளம்பி துபாய் வழியாக நாளை மறுநாள் (24.04.10 - சனி) காலை திருவனந்தபுரம் செல்கிறேன். அதன்பின் இரண்டு, மூன்று மாதங்கள் வீட்டில் ஓய்வாக இருக்கலாம் என எண்ணம். திருநெல்வேலி மாவட்டம் அம்பாசமுத்திரம் தாலுகாவில் உள்ள சொந்த ஊரில்தான் இருப்பேன். சென்னை, மதுரை, திருச்சி என தமிழகம் முழுதும் பரவலாக பயணம் செய்ய வேண்டியும் உள்ளது. ஊரில் சந்திக்க விரும்பும் நண்பர்கள் thubairaja@gmail.com என்ற இணைய முகவரிக்கு தனிமடல் இடுங்கள். நிச்சயம் சந்திப்போம்.

நன்றி. வணக்கம்.

எகிப்திய விருந்து

2010-04-21T00:16:00.017+04:00

நேற்றைய பதிவில் எகிப்தியர் எளிய உணவுதான் உண்பர். ஆனால் விருந்து என்று வந்துவிட்டால் வெளுத்து கட்டிவிடுவர் என்று கூறியிருந்தேன். இன்று எனது கூற்று உறுதிப்படுத்தப்பட்டது.

எகிப்தில் நாங்கள் பணிபுரியும் மின்சாரஉற்பத்தி நிலைய கட்டுமான திட்டம் (Power Plant Project) இறுதிக்கட்டத்துக்கு வந்துவிட்டதால் ஒரேயடியாக ஊர் திரும்பும் தினம் உறுதி செய்யப்பட்டு விட்டது. இதனை அறிந்தது முதல் உள்ளூர் நண்பர்கள் விருந்திற்கு அழைத்துக்கொண்டே இருந்தனர். எவ்வளவோ மறுத்தும் விடாப்பிடியாக இழுத்துச் சென்று மிகச்சிறந்த விருந்தளித்து உபசரித்து மகிழ்ந்தனர்.

அலெக்சாண்டிரியா நகரத்தில் கேரி ஃபோரின் எதிரே அமைந்துள்ள டவுண் டவுன் என்னும் இடத்தில் உள்ள புகழ்பெற்ற பல்பா என்ற எகிப்திய உணவகத்திற்கு சென்றோம்.

உணவகம்

இடம் பிடிச்சாச்சு

சாப்பாடு எப்படி இருக்கும்...

நம்பர் ஒன். சூப்பரா இருக்கும்...

ஸ்டார்ட்டர்கள், வெஜிடபிள் சாலட், பல விதமான சட்னிகள்....

புறா சூப்.

சுவையான எகிப்திய ரொட்டி

காய்ந்த திராட்சை நிறைய போட்டு சூடும்,சுவையும் நிறைந்த வாத்து பிரியாணி

ஸ்டார்ட் மியூசிக்....

சாப்பிட்டு முடிச்சாச்சு...

எல்லாரும் கையைக் கட்டிட்டா பில் யார் கொடுப்பா...

அருமையான விருந்து தந்த அன்பு உள்ளங்கள்

சரியா சாப்பிடலையாம். வீட்டுக்கு போய் சாப்பிட தனி பார்சல்...

அப்போ கெளம்புவோமா....

ஆப்பிரிக்காவின் ஆச்சரியம் - எகிப்து

2010-04-19T23:08:00.007+04:00

எகிப்து- ஆப்பிரிக்கா கண்டத்தில் அமைந்து, ஆசிய கலாச்சாரத்தோடு , அரேபிய பழக்க வழக்கங்களோடு, ஐரோப்பிய நாகரிகமும் கலந்த ஆச்சரியமான நாடு. ஆசிய , ஐரோப்பிய, ஆப்பிரிக்க கண்டங்களின் நுழைவாயிலாகவும், அரேபி பேசும் நாடுகளில் பெரியதாகவும் எகிப்து உள்ளது.

ஆப்பிரிக்காக் கண்டத்தில் இருந்தாலும் எகிப்திய மக்கள் மற்ற ஆப்பிரிக்க நாட்டு மக்களைப் போன்ற தோற்றம் இல்லாமல் நமது காஷ்மீரிகளைப் போல் சிவந்த நிறமும் , அழகு தோற்றமும் கொண்டவர்கள். நாட்டின் பெரும்பான்மைப் பகுதி பாலைவனம் என்றாலும் வற்றாத ஜீவநதியான நைல்நதியை கால்வாய்கள் மூலம் பலபகுதிகளுக்கும் கொண்டு சென்று பசுமையாக்கி உள்ளனர்.

மாவீரன் அலெக்சாண்டரால் மத்திய தரைக்கடல் கரையில் அமைக்கப்பட்ட அலெக்சாண்டிரியா நகரம் எப்போதும் குளிர்ந்த காற்று வீசும் அழகான குளுகுளு நகரமாகும். உலக அளவில் முன்னோடி மாதிரி நகரங்கள் வரிசையில் அலெக்சாண்டிரியா தனி இடம் வகிக்கிறது. இங்கு வருடத்தில் இரண்டு மாதம் மட்டுமே மிதமான கோடைக்காலம். பத்து மாதங்கள் பனிக்கால ஆடைகள் அணிந்து திரியும் மக்கள், இரண்டு மாதக் கோடையில் இரவு , பகல் எப்போதும் கடலில் குளித்து மகிழ்வர்.

புராதான பிரமிடுகள் தலைநகர் கெய்ரோ அருகிலே அமைந்திருந்தாலும், பல வரலாற்று சிறப்பு மிக்க இடங்களும், கோயில்களும் அப்பர் எகிப்து என அழைக்கப்படும் நைல்நதிக்கரையோரம் அமைந்துள்ள அஸ்வான் மற்றும் லோக்சூரிலே உள்ளன. சுற்றுலா பிரியர்களுக்கு ஏற்ற பல இடங்கள் எகிப்தில் உள்ளன. இங்கு வரும் முன் இணையத்தில் எல்லாத் தகவல்களையும் அறிந்து பின் வந்து சுற்றி பார்த்தால் இனிமையான பயணமாக இருக்கும்.

எகிப்தின் புராதன பெயர் மஸைர் என்பதாகும். எனவே அவர்கள் மஸ்ரிகள் என்றும் அழைக்கப்படுகிறார்கள். மற்ற அரேபிய நாடுகளை விட எகிப்தில் பேசப்படும் அரேபி மிகவும் இலக்கணச் சுத்தமுடையது. மென்மையான, இனிமையான உச்சரிப்பு கொண்டது. அமீரகத்தில் இருந்தபோது அங்குள்ளவர்களின் கடினமான உச்சரிப்பால் அரேபியை முரட்டு மொழி என்றுதான் நானும் நினைத்துகொண்டிருந்தேன். ஆனால் இங்கு வந்த பிறகு எகிப்தியர்கள் பேசும் இனிமையால் கவரப்பட்டு அரேபியை கற்றறிந்து சரளமாக பேசுகிறேன்.

இந்தியர்கள் என்றால் எகிப்தியர்களுக்கு மிகவும் பிடிக்கும். காந்திஜி, நேருஜி, இந்திராஜி என நமது தேசத்தலைவர்களை பிரியமாக அழைக்கிறார்கள். லண்டனுக்கு வட்டமேஜை மாநாடு செல்லும் வழியில் காந்தியடிகள் எகிப்து வந்து சென்றதை இப்போதும் பலரும் நினைவு கூறுகிறார்கள். வல்லரசுகளின் பனிப்போருக்கு எதிராக நமது அன்றைய பிரதமர் திரு. நேருவும், எகிப்திய அதிபர் திரு.நாசரும், இந்தோனேஷிய அதிபர் திரு.சுகர்த்தோவும் இணைந்து அணி சேரா இயக்கம் ஆரம்பித்தபின் இந்தியா எகிப்திற்கு பல உதவிகள் செய்துள்ளது என்று நன்றியோடு கூறுகிறார்கள். விமான நிலையத்தில் வந்து இறங்குவது முதல் நாம் இங்கு எங்கு சென்றாலும் முதல் மரியாதைதான்.

இந்திப்படங்கள்தான் எல்லா வீடுகளிலும் 24 மணி நேரமும் டிவி சேனல்களில் ஓடும். ஏனென்றால் நமது கலாச்சாரமும், எகிப்திய கலாச்சாரமும் ஏறக்குறைய ஒன்றுதான். அமிதாப்பச்சன் எகிப்தியர்களின் ஆதர்சன ஹீரோ. எந்த நாட்டில் நீங்கள் எகிப்தியரை சந்தித்தாலும் அமிதாப்பச்சன் பற்றி பேசாமல் இருக்கமாட்டார். எகிப்தில் அமிதாப் சிறுவர் முதல் பெரியவர் வரை அனைவரையும் கவர்ந்த சூப்பர் ஹீரோவாக திகழ்கிறார். இப்போதும் வார இறுதிகளில் அவர் நடித்த பழைய ஆக்சன் இந்திப் படங்களே எல்லா டி.வி. சானல்களிலும். அதிபர் தேர்தலில் நின்றால் கூட அன்னபோஸ்ட்டாக ஜெயித்துவிடுவார். ஒருமுறை அவர் எகிப்து வந்திருந்த போது ஏர்போர்ட்டிலும், வழி நெடுங்கிலும் மக்கள் அலை அலையென கூடி உற்சாக வரவேற்பு அளித்தனராம். இந்திப்படங்களில் நடித்துள்ளதால் நமது ரஜினி, கமலுக்கு கூட இங்கு ரசிகர் உண்டு.

வளைகுடா நாடுகளில் இந்தியர்களோடு வேலை பார்த்த எகிப்தியர்கள் பலரும் சரளமாக இந்தி பேசி நம்மை ஆச்சரியப்படுத்துகின்றனர். ரொட்டி போன்று பெரும்பாலும் மிக எளிமையான உணவே உண்ணுகின்றனர். எகிப்து குளிர்ந்த நாடு என்பதால் வியர்ப்பதே இல்லை. எனவே கோடைக்காலத்தை தவிர மற்ற காலங்களில் மிக குறைவாகவே நீர் அருந்துகின்றனர். குளிருக்காக எப்போதும் சூடான தேநீர் அருந்திக்கொண்டே இருப்பர். குளிர் காரணமாக பெரும்பான்மையோருக்கு சிகரெட் புகைக்கும் பழக்கம் உள்ளது. ஆண்களோடு பெண்களும் சீசா எனப்படும் ஹூக்கா புகைப்பதில் வல்லுநராக உள்ளனர்.

பெரும்பாலும் அவரவர் துணையை அவரவரே தேடிக்கொள்கின்றனர். உடன் படிப்பவர்கள், நண்பனின் சகோதரி, உறவினர்கள் என குறுகிய வட்டத்தினுள்ளே காதல் மலர்கிறது. ஆண்கள் முதலில் குறிப்பிட்ட பெண்ணின் சம்மதம் பெற்ற பின் தங்கள் பெற்றோரிடம் தெரிவிக்கின்றனர். பின் நமது நாட்டைப் போலவே மணமகன் வீட்டார் பெண் வீட்டிற்கு சென்று பேசி திருமண நிச்சயார்த்தம் செய்கின்றனர். அதன்பின் எத்தனை ஆண்டானாலும் சொந்த வீடு, வசதியான வாழ்க்கைக்கு தேவையான பணம், நல்ல வேலை, திருமணத்திற்காக மணமகளுக்கு கொடுக்க வேண்டிய பரிசுகள் ஆகியவற்றை மணமகன் சேர்த்த பின்னரே திருமணம் என்பதால் தற்போதைய காலத்தில் எகிப்தில் திருமணம் ஆகாதவர் எண்ணிக்கை அதிகரித்துள்ளது.

எகிப்திய மருத்துவர்களும், கட்டுமான பொறியாளர்களும் உலக அளவில் மிகவும் புகழ் பெற்றவர்கள். அவர்களது திறமைக்கு பல்லாயிரக்கணக்கான ஆண்டுகள் கடந்தும் பார்ப்போரை வியக்க வைக்கும் பிரமிடுகளும், பதப்படுத்தப்பட்ட உடல்களான மம்மிகளுமே சாட்சி.

எகிப்து குறித்த எனது முந்தைய பதிவுகள்

அலெக்சாண்டிரியா நகரம் - 1 , 2 , 3

கட்டுமானப்பணியில் பல நாடுகள் சென்று கொண்டிருந்தாலும் கடந்து ஒன்றரை ஆண்டுகளாக இந்தியாவில் இருப்பது போன்ற உணர்வை தந்த எகிப்தை விட்டு பிரிவது மனதிற்கு கஷ்டமே....

நெஞ்சு பொறுக்குதில்லை இந்த நிலை கெட்ட மாந்தரை நினைந்துவிட்டால்...

2010-04-18T15:23:00.004+04:00

தலைவர் இருக்கிறாரா, இல்லையா என்று பல தமிழ் உணர்வு மிகுந்த தமிழ் உள்ளங்கள் தவித்துகொண்டிருக்கும் பொழுது தந்தையின் திடீர் மறைவு பேரிடியாய் விழுந்தது. அதற்குள் அதிர வைக்கும் அடுத்த செய்தி. பக்கவாதத்தால் பாதிக்கப்பட்டு வைத்தியத்திற்காக இனவாத இலங்கை அரசின் அனுமதியோடு மலேசியா சென்று பின் முறையான ஆவணங்களோடு தமிழகம் வந்த தாயார் விமானநிலையத்தில் தடுக்கப்பட்டு, திருப்பி அனுப்பப்பட்டுள்ளார். அவர் என்ன ஆட்சிக்கட்டிலில் இடம் கேட்டாரா அல்லது அடுத்த புரட்சிக்கு ஆள் திரட்ட வந்தாரா... இம் என்றால் சிறைவாசம், ஏன் என்றால் வனவாசம் என்று கேள்விப்பட்ட கற்காலத்திற்கு சென்று கொண்டிருக்கிறோமோ என்ற எண்ணத்தை இந்த அரசாங்கத்தின் செயல்பாடுகள் தருகின்றன.

நெஞ்சு பொறுக்குதில்லை இந்த நிலை கெட்ட மாந்தரை நினைந்துவிட்டால்...

சிட்டாடல் கோட்டை - அலெக்சாண்டிரியா - எகிப்து

2010-04-16T02:07:00.026+04:00

சிட்டாடல் கோட்டை எகிப்து நாட்டில் அலெக்சாண்டிரியா நகரத்தின் மையத்தில் மத்தியதரைக்கடல்கரையில் அமைந்துள்ளது. கடல்வழியே அன்னியர்கள் புகுந்து விடாமல் கண்காணித்து தடுக்கவும், நகரின் பாதுகாப்பிற்காகவும் பண்டைய மன்னர்களால் கட்டப்பட்டது.

வெளிமதில் சுவர்கள்

கோட்டையின் உள்சுவர்கள்

கோட்டையின் கீழ் சுரங்கப்பாதைகள்

கோட்டையின் உள்ளே அமைந்துள்ள மீன் காட்சியகம்

கோட்டையின் உள்ளே...

மேல் கூரையில் செங்கல் சித்திரங்கள்

உள் அறைகளில் சில புராதன நினைவுச்சின்னங்கள்

கோட்டையின் நடுவில்...

கோட்டையின் மேல்தளம்

மத்தியதரைக்கடல், கப்பல்கள், அலெக்சாண்டிரியா நகரம்

இனிய தமிழ் புத்தாண்டு மற்றும் சித்திரை விசு திருநாள் நல்வாழ்த்துக்கள்.

2010-04-13T23:53:00.004+04:00

அன்பு நண்பர்கள் அனைவருக்கும் இனிய தமிழ் புத்தாண்டு மற்றும் சித்திரை விசு திருநாள் நல்வாழ்த்துக்கள்.

நமது முன்னோர்கள் காலம் காலமாக சீரும்,சிறப்புமாக கொண்டாடிய பண்டிகை. தமிழர்கள் மட்டுமல்ல திராவிட மக்களால் அண்டை மாநிலம் ஆந்திராவில் யுகாதி என்றும், மலையாளிகளால் சித்திரை விசு என்றும் சித்திரை மாதப்பிறப்பு சிறப்பாக கொண்டாடப்படுகிறது. தமிழ்நாள் காட்டிகளும், பல்வேறு குறிப்புகளும் தமிழ் ஆண்டின் தொடக்கமாம் சித்திரை மாதத்தின் சிறப்பை அறுதியிட்டு கூறுகின்றன.

என்னதான் இன்று ஆட்சியில் இருப்பவர்கள் வரலாற்றில் அவர்கள் பெயர் இடம்பெற சட்டம் போட்டு மாற்றினாலும் நாளை ஆட்சிக்கு வருபவர்கள் அவர்கள் பெயர் பெற மறுபடியும் தமிழ் புத்தாண்டை சித்திரை முதல்நாள் என்று அறிவிக்கப்போவது நிச்சயம். விடுமுறை நாள்களை குறைக்க வேண்டுமென்றால் பொங்கல், தீபாவளி போன்ற மற்ற முக்கியமான பண்டிகைகளையும் கோடை விடுமுறைக்கு மாற்றி விடலாமே...

மற்றவர்களை கேலி, கிண்டல் செய்யும் நாத்திக அரசியல்வியாதிகள் வீடுகளில் நள்ளிரவு யாகங்களும், ஹோமங்களும் நடந்து கொண்டுதான் இருக்கின்றன.அவர்கள் குடும்ப உறுப்பினர்கள் செல்லாத கோயில்கள் இல்லை. செய்யாத பூஜைகள் இல்லை. ஏன் நமது முதல்வரே மஞ்சள் சால்வை மகிமை தெரிந்தவர்தானே... பிறகு ஏன் சாதாரண மக்களின் சடங்கு, சம்பிரதாயங்களிலும், நம்பிக்கைகளிலும் குறுக்கிட வேண்டும்.

எங்கள் ஊரில் சித்திரை விசு பத்து நாள்களுக்கும் மேல் மிகவும் சிறப்பாக கொண்டாடப்படும் பண்டிகையாகும். வரிசையாக கல்லிடைக்குறிச்சி, அம்பாசமுத்திரம் அகத்தீஸ்வரர் கோவில் என ஒவ்வொரு நாளும் திருவிழாக்கள் நடத்தப்பட்டு கடைசியாக பாபநாசம் உலகாம்பிகை சமேத பாபநாச சுவாமி கோயில் தெப்பத்திருவிழாவோடு சித்திரை விசு பண்டிகை சிறப்பாக முடிவடையும்.

இந்த பண்டிகைக்காக எல்லா ஊர்களில் இருந்தும் பாபநாசத்திற்கு சிறப்பு பேருந்துகள் இயக்கப்படும். லட்சக்கணக்கான மக்கள் பாபநாசம் ஆற்றில் குளித்து கோயிலுக்கு சென்று வழிபடுவர். கூட்ட நெரிசலின் காரணமாக வழக்கமாக பாபநாசம் பஸ் டிப்போ வரை செல்லும் பேருந்துகள் இந்த பண்டிகையின் போது மட்டும் விக்கிரசிங்கபுரத்திலே நிறுத்தப்பட்டு விடும்.

விக்கிரமசிங்கபுரம் முதல் பாபநாசம் வரை சாலையோரம் பண்டிகை கால கடைகள் காணலாம். விடிய விடிய சாலைகளிலும், தெருக்களிலும் மக்கள் நடமாட்டம் இருந்து கொண்டே இருக்கும். இந்த வருடமும் நல்ல கூட்டம் என வீட்டுக்கு போன் செய்து அறிந்தபோது மிக்க மகிழ்ச்சியாக இருந்தது. உள்ளூர், வெளியூர் மக்களை மகிழ்விக்க ஒரு வாரத்திற்கும் மேலாக தினமும் இரவுகளில் கச்சேரிகளும், பட்டிமன்றங்களும், பல்சுவை நிகழ்ச்சிகளும் நடத்தப்படும்.

துபாயில் இருந்தவரை தீபாவளி, பொங்கல், புத்தாண்டு என எல்லாப் பண்டிகைகளையும் நண்பர்கள் அனைவரையும் அழைத்து மிகச்சிறப்பாக விருந்துகள் நடத்தி கொண்டாடுவோம். 2006 சித்திரை விசு அன்று உடன் இருந்த இனிய மலையாள நண்பர் முந்திய இரவே தட்டில் பழங்கள், கண்ணாடி வைத்து அலங்கரித்து விட்டு காலையில் அனைவரையும் எழுப்பி கண்விழிக்காமல் அழைத்து சென்று கனிநோக்கச் செய்தார். பின் ஊரில் செய்வது போலவே வெல்லத்தில் அவல் நனைத்தும், எரிசேரி, புளிசேரி, அவியல்,பாயாசம், அடைப்பிரதமன் போன்ற பாரம்பரிய பண்டிகை உணவுகளை சுவையாக தயாரித்து சிறப்பான விருந்தளித்தது மறக்கவே முடியாது.

அன்பு நண்பர்கள் அனைவருக்கும் இனிய சித்திரை விசு திருநாள் மற்றும் தமிழ் புத்தாண்டு நல்வாழ்த்துக்கள்.

சூயஸ் கால்வாய்

2010-04-10T15:27:00.017+04:00

எகிப்தில் ஏறத்தாழ எல்லா இடங்களையும் பார்த்து விட்டாலும் கட்டுமானத்துறையின் மிகப்பெரும் சாதனையான சூயஸ் கால்வாயை சென்று பார்க்க தகுந்த நேரம் வாய்க்கவில்லை. நாங்கள் இருக்கும் அலெக்சாண்டிரியா நகரிலிருந்து சுமார் 250கிலோ மீட்டர் தூரத்திலிருக்கும் இக்கால்வாய் அமைந்துள்ள போர்ட் சைட் நகருக்கு நேற்று திடீர் பயணமாக கிளம்பிவிட்டோம்.

சூயஸ் கால்வாய் எகிப்தில் உள்ள செயற்கைக் கால்வாய் ஆகும். இது மத்தியதரைக் கடலையும், செங்கடலையும் இணைக்கிறது. 163 கி.மீ நீளமும் 300 மீ அகலமும் கொண்ட இக்கால்வாய் 1869 இல் திறக்கப்பட்டது. இக்கால்வாயினால் ஐரோப்பாவிற்கும், ஆசியாவிற்கும் இடையே கப்பற்போக்குவரத்து மிக இலகுவானது. அதன்முன்னர் கப்பல்கள் ஆப்பிரிக்காவை சுற்றியே பயணிக்க வேண்டியிருந்தது. இக்கால்வாய் அமைந்த பின் கிட்டத்தட்ட 6000கிலோ மீட்டர் பயண தூரம் குறைந்ததால் உலக கப்பல் போக்குவரத்தில் இக்கால்வாய் முக்கிய பங்கு வகிக்கிறது.

சூயஸ் கால்வாய் வழிப்பாதையை குறிக்கும் உலக வரைபடமும், கால்வாயின் வழியில் உள்ள முக்கிய எகிப்து நாட்டு நகரங்களை காட்டும் படமும்.

பச்சை நிறமே.... பச்சை நிறமே....

பயண வழியே பேரீச்சை மரத்தோட்டங்கள்

பேரீச்சை மரங்களுக்கிடையே ஊடு பயிராக காய்கறிச் செடிகள்

நெல் வயல்களும், கீரைத் தோட்டங்களும்...

நீண்ட பயணத்தின் நடுவே சிறு ஓய்வு

எங்கள் வாகனமும், ஓட்டுநரும்

எங்கள் ஓட்டுநர் திரு.ஆதில் எங்கள் மீது பேரன்பும், பிரியமும் கொண்டவர். அலுவலகத்திற்கு மட்டும் அல்லாமல் எங்கள் எல்லா எகிப்திய பயணங்களிலும் உடன்வந்து பல உதவிகள் செய்தவர். பகலில் இந்த சாலை ராடார் கண்காணிப்பில் இருப்பதால் காலையில் செல்லும் போது மெதுவாக 4மணி நேரம் ஓட்டி சென்றவர் இரவு திரும்பும் போது 2மணி நேரத்தில் பறந்து கொண்டு வந்து பாதுகாப்பாக சேர்த்தார்.

செல்லும் வழியில் ஒரு சிறிய மீன்பிடி துறைமுகம்

அழகிய மணல் மேடுகள்

இந்த மணல் மேடுகளுக்கு பின்புறம் கடல்

வந்தாச்சு...வந்தாச்சு... சூயஸ் கால்வாய் வந்தாச்சு

இக்கரையிலிருந்து அக்கரை ஒரு பார்வை

பொதுமக்களும், சுற்றுலா பயணிகளும் இக்கரையிலிருந்து அக்கரை சென்று பார்த்து விட்டு திரும்பி வர இலவசமாக கப்பலகள் தொடர்ந்து இயங்கி கொண்டே உள்ளன. நாம் செல்லும் கார்களையும் மிகச்சிறிய கட்டணம் செலுத்தி கப்பலில் ஏற்றிச்செல்லாம்.

படகில் ஏறி பயணம்

கப்பலில் இருந்து கால்வாயின் தோற்றம்

கால்வாயை கடக்கும் கப்பல்கள்

அக்கரையில் அமைந்துள்ள அழகிய மசூதி

நாங்கள் சென்ற கப்பல். கார்களையும் ஏற்றி செல்லலாம்.

கப்பலில் இருந்து கரையில் இறங்கும் கார்கள்

பிரிட்டிஷார் வசித்த பழைய காலத்து வீடுகள்

கண்ணைக் கவரும் கால்வாயும், கப்பல்களும்...

அன்பு நண்பர்களே, மூன்றாம் நூற்றாண்டிலே புராதான மன்னர்களால் ஆரம்பிக்கப்பட்டு, பின் பல நாட்டு அரசுகளின் விடாமுயற்சியால் வெற்றிகரமாக அமைக்கப்பட்டு பல போர்களையும், போராட்டங்களையும் சந்தித்து தற்போது எகிப்திற்கு பெரும் வருமானத்தை அள்ளித்தரும் சூயஸ் கால்வாய் குறித்த மேலதிக வரலாற்று தகவல்களையும், அரிய பல புகைப்படங்களையும் இந்த சுட்டியில் சென்று பார்த்து மகிழுங்கள்.

சாதுர்யம் பேசாதடி....

2010-04-04T16:09:00.004+04:00

ஒரு ஊரில் ஒரு நல்ல திறமைசாலி இருந்தான். ஒரு நாள் கடைவீதி சென்றிருந்த பொழுது நடந்த கலவரத்தின் நடுவே மாட்டிக் கொண்டதால் அந்த வழக்கில் இவன் பெயரும் சேர்க்கப்பட்டு சிலமாதம் சிறைத்தண்டனை அடைந்தான். சிறையில் இருந்த நேரம் யாரிடமும் பேசிப்பழக பிடிக்காமல் ஒரு எறும்பை பிடித்து தீப்பெட்டியில் வைத்து வளர்த்தான். அந்த எறும்பிற்கு பலவித்தைகளும் கற்றுக் கொடுத்து அவன் சொல்பேச்சு கேட்கும்படி பழக்கினான். சிறையில் உடன் இருப்பவர்கள் எல்லாம் கெட்டவர்கள் என்ற எண்ணத்தில் யாரிடமும் இதைப் பற்றி கூறவே இல்லை.

தண்டனைக்காலம் முடிந்தது. சிறையை விட்டு வெளியே வந்தவுடன் இந்த ரகசியத்தை யாரிடமாவது பகிர்ந்து கொள்ளவேண்டும் என்ற பேராவல் எழுந்தது. கண்ணில் பட்ட ஹோட்டலில் நுழைந்து காலியாய் இருந்த இருக்கையில் அமர்ந்தான். தீப்பெட்டியில் இருந்து எறும்பை எடுத்து மேஜையின் மேலே விட்டான். சில வித்தைகளை செய்ய சொல்லி “ என்ன சார், சாப்பிடறீங்க ” என்று கேட்டவாறு அருகில் வந்த சர்வரிடம் “இதோ பார்” என்றவாறு எறும்பை காண்பிக்க அவனோ “சாரி சார்” என்று கூறி அந்த எறும்பை நசுக்கி கொன்றான்.

கருத்து : அருமை தெரியாத இடத்தில் பெருமை பேசாதே....

எட்டாப்பு கவிதைகள்...

2010-04-03T10:54:00.003+04:00

தொழிலாளி
ஒரு வருடமாக ஓடாத ஆலை
உருப்படியா கிடைக்கலையே ஒரு வேலை
வெளியே போனால் கடன்காரர் உரித்து விடுவார் தோலை
உங்களுக்கு தெரியுமா அந்த ஆளை
அவன் தான் தொழிலாளி.

வியாபாரி
குறைந்த விலைக்கே பொருட்களை வாங்கி
அதிக விலைக்கு விற்பான் மனசு நீங்கி
அதனை வாங்க ஏழைகள் ஏங்கி
அதன் மூலம் வயிறு வீங்கி
வாழ்பவன் தான் வியாபாரி

எட்டாம் வகுப்பு படிக்கும் போது தமிழாசிரியர் விடுமுறையில் சென்றார். அந்த ஒரு மாதம் மட்டும் எங்களுக்கு தமிழ் பயிற்றுவிக்க வந்த பயிற்சி ஆசிரியை இலக்கிய மன்ற வகுப்புகளில் வித்தியாசமாக அனைவரையும் கதை, கவிதை, எழுதச் சொன்னார். எதுகை மோனையாய் எழுதுவதுதான் கவிதை என்றெண்ணி எத்தனையோ தத்துபித்து கவிதைகள் எழுதினாலும் அப்போது எழுதியவற்றிலே என்னை மிகவும் கவர்ந்தது கீழே உள்ள கவிதைதான்.இதனை ஏற்கனவே பதிவாகவும் இட்டுள்ளேன்.

கவர்ச்சி
நிலாக் கன்னியிடம்
அப்படியென்ன
கவர்ச்சி ??!!.

அவளைச் சுற்றி
மட்டும் அத்தனை
நட்சத்திரக் காளையர்கள் !!.!!.

இன்னொரு நண்பன் எழுதியது...
ஏ கிட்டு..
உன்கிட்டே இருக்கு லட்டு
கொடுத்திடு அதைப் பிட்டு
இல்லைன்னா முதல்ல திட்டு
அப்புறம் மண்டையில் விழும் குட்டு.

இன்னொரு நண்பனோ பலபடி மேலே போய் கல்கி, சாண்டில்யன் போல மிகப்பெரிய சரித்திரக்கதை எழுதி அழகழகாய் படங்களும் வரைந்து யாரிடமும் காண்பிக்காமல் வைத்திருந்தான். ஒரு நாள் என்னை அவன் வீட்டிற்கு அழைத்துச் சென்று அவனது படைப்புகளை எல்லாம் காண்பித்தான். அவனது திறமை கண்டு மிரண்ட நான் அதன்பின் பதிவுலகம் வரும்வரை கவிதை எழுதுவதையே விட்டுவிட்டேன். அவன் வீட்டிற்கு செல்வதையும்தான்.

நம்ம ஊரு... நல்ல ஊரு...

2010-04-02T12:18:00.015+04:00

வேணாம், வேணாம்ன்னு தான் பார்த்தேன். வார்த்தைக்கு வார்த்தை அண்ணாச்சி, அண்ணேன்னு கூப்பிட்டு தங்களை யூத்தா காமிச்சிகிறவங்களுக்காகவும், அல்ல்லோ... ஒரு நிமிஷம் முன்னாடி பிறந்தாலும் அப்படிதான் கூப்பிடுவோம்ன்னு டயலாக் விடுறவங்களுக்காகவும்தான் இந்த பதிவு.

சென்ற மாதம் மிகவும் குறுகிய விடுமுறையில் வந்ததால் சந்திப்பதாக கூறிய நண்பர்களை சந்திக்க முடியாததற்கு மாப்பு கேட்டுக்கிறேன். முக்கியமா நண்பர் எறும்பு ராஜகோபால்.. (அல்லோ... நானாவது 10 நாள் ஊர்ல இருந்தேன். நீங்க 2 நாள் கூட இருக்கலை). இந்த மாத இறுதியில் மீண்டும் ஊருக்கு வருகிறேன். இரண்டு, மூன்று மாதம் இருக்கலாம் என எண்ணம். வாங்க நண்பர்களே நல்லா பழகுவோம்.

நேரமாற்றத்தினால் ஊருக்கு வந்து ஒரு வாரம் எல்லாம் மங்கலாகவே இருந்தது. தெளியும்போது திரும்பி வந்தாயிற்று. இங்கு பயங்கர குளிர். ஊரிலோ கோடை ஆரம்பமாகி அனல் பறக்கிறது. இங்கு குளிரைத் தடுக்க எப்போதும் நாலு சட்டை போட்டு அலைந்த உடம்பிற்கு நம்ம ஊரு வெயிலில் அலைய சுகமாகவே இருந்தது என்றாலும் அதுவே சோதனையாகவும் அமைந்து விட்டது. ஆம். ஊரில் இருந்து கிளம்பும்போதும் இங்கு வந்த பின்னும் ஒரு வாரம் ஜலதோஷம், காய்ச்சல்..சரி என்னதான் இருந்தாலும் நம்ம ஊரு நம்ம ஊரு தானே...

சொர்க்கமே என்றாலும் அது நம்மூரு போல வருமா...

இந்த முறை ஊருக்கு வந்திருந்த போது எடுத்த சில படங்கள் உங்கள் பார்வைக்கு...

திருநெல்வேலி மாவட்டத்திலே அதிக கொள்ளளவு கொண்ட மணிமுத்தாறு அணை எங்கள் ஊரில்தான் உள்ளது. எங்கள் வீட்டிலிருந்து பார்த்தால் தெரியும் அணையின் தோற்றம்.

அணைக்கு பின்னாடி உள்ள மலையில்தான் வருடம் முழுதும் தண்ணீர் கொட்டும் மணிமுத்தாறு அருவி உள்ளது. ஊருக்கு போனால் தினமும் ஆற்றிலும், அருவியிலும் தான் குளியல்.

நினைக்கும் போதெல்லாம் அணைக்கு செல்வோம். அப்படி சென்ற போது எடுத்த படங்கள்.

ராஜா மகள் "பூ"ஜா

பூஜாவின் பின்னே தெரிவது மணிமுத்தாறு நீர்த்தேக்க தோட்டமும், பொதிகை மலைத்தொடரும்.

சிங்கநடை போட்டு சிகரத்தில் ஏறு...

பூப்பறிக்க போகிறோம், பூப்பறிக்க போகிறோம்

ராஜா கையில பூஜா

பூஜா கையில பூ தான்

அணைக்கு மேலே செல்ல உதவும் அழகிய மலைச்சாலை

அணைக்குப் பின்னே மலைமுகட்டில் மறையும் சூரியன்
தன் தங்ககதிர்களை
தண்ணீரெல்லாம் பரப்பியபடி

ஒளி ஓவியம்

பூஜா - ஏ...அப்பா... என்னா போஸ்...

பூஜா - நோ ஸ்மைல் ப்ளீஸ்...

எங்கள் இருவருக்கும் பின்னே தெரியும் சிறிய மலைக்குன்றின் கீழ்தான் எங்கள் வயல்காடு உள்ளது. அதற்கும் பின்னே சிறிது வெள்ளையாக தெரிவதுதான் எங்கள் ஊர்.

போதும்...போதும்... வீட்டுக்கு போவோம்

படுபாவி

2010-04-01T21:13:00.003+04:00

அடுத்த பதிவென்ன எழுதலாம்
உணவு நேரத்தின் போது
ஒரே சிந்தனை

ஆழ்ந்த யோசனைக்குப் பின்
அகப்பட்டது விஷயம்

அம்மன் கோயில் கொடையில்
ஆடு வெட்டினார்களே
அதைக் கண்டித்து
ஆறுபத்தியில்
அழகான பதிவு

நறுக்கான தலைப்பும்
கிடைத்திட்ட மகிழ்ச்சியில்
வேகவேகமாக மென்றிட்ட
வாயிலே கடுக்முடுக்

போன்லெஸ்ன்னு சொல்லி
ஏமாத்திட்டானே படுபாவி
ஹோட்டல்காரன்

கொல்லம் மெயில்

2010-03-31T17:08:00.016+04:00

கொல்லம் மெயில் . திருநெல்வேலி மாவட்ட மக்கள் அனைவருக்கும் மிக அறிமுகமான ஒன்று. ஏன்னா கேரள மாநிலம் கொல்லத்துல கிளம்பற இந்த ரயில் திருநெல்வேலி ஜங்ஷன் வந்த பின் தான் திருச்செந்தூர் போற ரயில் கிளம்பும். அச்சன்கோவில்,ஆரியங்காவு, தென்மலை வழியா தமிழ்நாட்டின் செங்கோட்டைக்குள் நுழைந்து தென்காசி,பாவூர்சத்திரம், அம்பாசமுத்திரம், கல்லிடைக்குறிச்சி, சேரன்மகாதேவி,நெல்லை டவுண் போன்ற நகரங்கள், பல கிராமங்கள் வழியாக திருநெல்வேலியை அடைந்து பின் திருச்செந்தூர் வரையும் நீட்டிக்கப்படுகிறது.

கிட்டத்தட்ட ஐம்பது ஆண்டுகளுக்கும் மேலாக நெல்லை மக்களின் வாழ்வில் இணைந்து விட்ட இந்த ரயிலை சுற்றி அலுவலகங்கள் செல்வோர், கல்லூரிகள், பள்ளி மாணவர்கள், வியாபாரிகள், பொதுமக்கள் உலகமே இயங்கி கொண்டிருந்தது. பலதரப்பட்ட மக்களுக்கும் பயன் அளித்து வந்த இந்த மீட்டர்கேஜ் ரயில் அகல ரயில் பாதை வேலைகளுக்காக கடந்த 2008ம் ஆண்டு முதல் நிறுத்தப்பட்டது. இறுதிகட்டத்தை நெருங்கியுள்ள பணிகள் முடிவடைந்து இந்த வருட இறுதிக்குள் மீண்டும் இயக்கப்படும் என எதிர்பார்க்கப்படுகிறது.

பிரிட்டிஷ் ஆட்சிக்காலத்தில் அமைக்கப்பட்ட இந்த ரயில்பாதையில் பல தொன்மையான பாலங்களும், மலையினை குடைந்து அமைக்கப்பட்ட பல குகைப்பாதைகளும் உள்ளன.சிறிதும், பெரியதுமாக பல மலைக்குகை சுராங்கப்பாதைகளும், இயற்கை அழகு காட்சிகளும் மனதிற்கு மகிழ்ச்சியையும் வித்தியாசமான அனுபவத்தையும் தரக்கூடியவை.

நான் பலமுறை இந்த வழியாக சென்று வந்த பொழுது எடுத்த சில படாங்களும், காணொளிக்காட்சிகளும் உங்கள் பார்வைக்கு.

ஒரு சிறிய மலைக்குகையில் நுழையும் ரயில்....

ஒரு அழகிய நீர்நிலை...

வண்டி, வண்டி.. ரயிலு வண்டி... இந்த பாலத்தை பல திரைப்படங்களிலும் பார்த்து வியந்திருப்போம்.

மலைச்சரிவில் அமைக்கப்பட்டுள்ள அன்னாச்சி பழத்தோட்டம்

தடக்..தடக்..தடக்.. தடக்..தடக்..தடக்..

பாலத்தின் முழுத்தோற்றம்

தேக்குமரங்கள் அடர்ந்த மலையடிவாரம்.....

தேக்குமரங்கள், தென்னை மரங்கள் சூழ ஒரு வீடு....

பலவித மரங்கள் அடர்ந்த காடு....

தேனினும் இனிய சுவை கொண்ட பலா காய்த்து தொங்கும் தோட்டம்..

மாந்தோப்பு....

மனதை மயக்கும் மலைச்சாரல்...

தென்மலை ரயில் நிலையம்

ஓ நண்பனே..நண்பனே..நண்பனே...

கடக்கும் ரயில்கள்

இயற்கை சூழ்பாதையில் இனிய பயணம்

கூடவே வரும் ஒரு ஹேர்பின் வளைவுச்சாலை

என்ன விலை அழகே.....

மலை உச்சியில் ஒரு முகம் தெரியுதா...

அடப்பாவி மக்கா.... நிம்மதியா மேயக்கூட விடமாட்டாங்க....

நீல வானமும்,நெடிய மலை முகடுகளும்...

குற்றாலத்தில் தன்ணியில்லைன்னா வெறும்பாறை மட்டும்தான் பாட்டு படிக்கும்......

என்னடா வெறும் இருட்டா இருக்கேன்னு குறை சொல்லக்கூடாது. ஒரு பெரிய மலைக்குகையினுள் செல்லும்போது எடுத்த காணொளி. சத்தத்தோடு கேட்டால் ரொம்ப த்ரில்லிங்கா இருக்கும்.

இது இன்னொரு பெரிய மலைக்குகை...

இந்த ரயில் மறுபடியும் ஓடத்தொடங்கியவுடன் சீக்கிரம் குடும்பத்தோட ஒரு தடவை போய்ட்டு வரணும்ன்னு பிளான்.நீங்களும் வர்றதா இருந்தா சொல்லுங்க. போகும்போது தெரியப்படுத்துறேன்.

ராஜா... கல்யாண... வைபோகமே....

2010-03-29T23:04:00.008+04:00

கடவுள் அமைத்து வைத்த மேடை இணங்கும் கல்யாண மாலை. இன்னார்க்கு இன்னார் என்று எழுதி வைத்தானே தேவன் அன்று...

டண்டண் டண்டணடண்டண் டண்டண் டண்டணடண்டண் டண்டண் டண்டணடண்டண் ....

ஓக்கே ... ஸ்டாப் மியூசிக்...

ரொம்ப நாளா எழுத நினைச்ச ரொமான்ஸ் விஷயத்தை நம்ம அனன்யா தொடர்பதிவு எழுத அழைச்சிருக்காங்க...

ஊர்ல மோஸ்ட் வாண்டட் பேச்சிலரா இருந்ததால ஏற்பட்ட தொந்திரவுகள் தாங்காமல் டகார்ன்னு துபாய்க்கு எஸ்கேப்பியாச்சு. சென்னை, ஹைதராபாத்ல இருந்தவரை துரத்தி, துரத்தி வந்த பொண்ணு வீட்டுக்காரங்க அதற்கப்புறம் நேரடியா நம்மளை அட்டாக் பண்ணமுடியாம வீட்டுல டார்ச்சர் கொடுக்க ஆரம்பிச்சுட்டாங்க. அப்பா,அம்மா,அக்கா அடிக்கடி இந்த விஷயமா மாத்தி மாத்தி போன் பண்ணதாலே ஊருக்கு போனா ஏடாகூடாமா வசமா மாட்டி விட்டுடுவாங்களோங்கிற பயத்துல ஒன்றரை வருஷம் ஊர்ப்பக்கமே வரலை. வருஷத்துக்கு இரண்டு லீவுங்கிறதாலே எங்க பாஸும் ஊருக்கு போகலையா, ஊருக்கு போகலையான்னு கேட்டு கேட்டு அலுத்து போயிட்டார்.

2006ம் வருஷம் புத்தாண்டு தினத்தன்று திடீர்ன்னு ஒரு ஞானோதயம். சரி இந்த வருஷத்தோட "பேச்சு இலர்" வாழ்க்கையை முடிச்சுட்டு "குடும்ப இஸ்திரி" ஆயிடலாம்ன்னு.. அதற்கப்புறம் வீட்டுல சொல்ற விஷயங்களை கொஞ்சம் காது கொடுத்து கேக்க ஆரம்பிச்சேன். நமக்கேத்த மாதிரி நல்ல குடும்பமா பார்த்து முடிச்சிருங்கன்னு சொல்லிட்டேன். இது கேள்விப்பட்ட என்னோட பாஸ் “நீ இங்கே இருந்தா எப்படி... ஊருக்கு போய் ஆகுற வேலையை பார்”ன்னு டிக்கெட் புக் பண்ணி கைல கொடுத்திட்டார்.

இதற்கு நடுவில் ஒரு கல்யாண வீட்டுக்கு போயிருந்த அப்பா, அம்மாவிடம் குடும்ப உறவினர் ஒருவர் ஒரு பெண்ணை காண்பித்து "பிடிச்சிருந்தா சொல்லுங்க. உங்க பையனுக்கு பேசி முடித்துவிடலாம்" என்று கூறியுள்ளார். அக்கா, மாமாவும் அந்த கல்யாணத்துக்கு போயிருந்ததால் அவர்களும் பார்க்க எல்லோருக்கும் பிடித்து போய்விட மறுநாளே எனக்கு தகவல் வந்தது. சினேகா அப்போ பேமஸ் என்பதால் பெண் சிநேகா போல் இருப்பார் என பயங்கர பில்டப். நம்மளும் கவிதைல்லாம் எழுதிட்டோம்.

ஜாதகப் பொருத்தம் பார்க்கப் போனபோது மனப்பொருத்தம் இருந்தால் பண்ணிக்கொள்ளுங்கள் என்று கூறியிருக்கிறார்கள்.அவர்கள் வீட்டில் எங்கள் குடும்பத்தை ஏற்கனவே அறிவார்கள். என்னை பற்றி கூறியவர்கள் எல்லாம் விஷால் மாதிரி இருப்பார், ஸ்ரீகாந்த் மாதிரி இருப்பார்ன்னு ஏகப்பட்ட பில்டப் கொடுத்திருக்கிறார்கள். மணப்பெண்ணோடு கல்லூரியில் படித்த எங்களூர் பெண் ஒருவர் வேற எங்க ஊர்லயே அம்சமான ஆளு நான்தான்னு சொல்லியிருக்கு. எங்கண்ணன் கல்யாணத்துக்கு ஊரழைக்க போயிருந்தபோது அந்த பொண்ணு நம்மளை சைட்டு அடிச்சிருக்குது.

இதெல்லாம் தெரியாம 2006 ஜூன் 10ம் தேதி யதார்த்தமா போன என்னை அக்காவும், மாமாவும் பாத்திரத்துல மாட்டுன பதார்த்தமா ஏர்போர்ட்டுல இருந்து வீடு போறவரைக்கும் பொண்ணு புராணம் சொல்லி வறுத்தெடுத்திட்டாங்க. ஏர்போர்ட்டுல வீடு போய்ச் சேர ராத்திரி 11 மணி ஆயிட்டுது. அதற்கப்புறம் அப்பா,அம்மா கண்டினியூவா ட்யூன் பண்ண ஆரம்பிக்க (ஆர்வம்) தாங்கமுடியாம பொண்ணு பார்க்க நாளைக்கே போயிடுவோம்ன்னு சொல்லிட்டேன்.

மறுநாள் காலையில் அவங்க வீட்டுக்குக்கு பக்கத்துல நடந்த என் பிரெண்டோட அக்கா கல்யாணத்துக்கு போயிட்டு அவங்க வீட்டுக்கு போன் பண்ணி பொண்ணு பார்க்க விஷயத்தை சொன்னோம். மதியம் ஒரு மணிக்கு மேலதான் நல்லநேரம். அப்ப வாங்கன்னு அவங்க சொல்லவும் கல்யாண வீட்டுலே கொஞ்சநேரம் இருந்துட்டு மதியசாப்பாடும் சாப்பிட்டுட்டு அவங்க வீட்டுக்கு போனா ஒரு பெருங்கூட்டமே திரண்டு இருந்ததை பார்த்த நான் அப்படியே ஷாக்காயிட்டேன். "பேசுறாங்க,பேசுறாங்க... பேசிகிட்டே இருக்காங்க.. " பொண்ணை கண்ணுல காமிக்கிற மாதிரியில்லை. பொறுத்து, பொறுத்து பார்த்து பொறுமையிழந்த நான் டகார்ன்னு எந்திச்சு பொண்ணு இருந்த ரூம்ல பூந்துட்டேன்.

எல்லோரும் அதிர்ச்சியடைந்தாலும் "சரி,சரி,மாப்பிள்ளை தனியா பேச ஆசைப்படறார் போல" ன்னு சொல்லிகிட்டு ஒரு பத்துபேரு அந்த ரூமுக்குள்ளே வந்துட்டாங்க. பொண்ணுகிட்ட நான் என்ன கேட்டாலும் பொண்ணுக்கு முன்னாடி அந்த பத்து பேரும் பதில் சொல்றதைப் பார்த்து கடுப்பான எங்க அக்கா, " வாங்க நாம எல்லாரும் வெளியே இருப்போம். அவங்க ரெண்டு பேரும் தனியா பேசட்டும்"ன்னு சொல்லி எல்லாரையும் வெளியே தள்ளிகிட்டு போனாங்க. "அப்பாடி"ன்னு பொண்ணு பக்கம் திரும்பி "என்ன படிச்சிருக்கீங்க"ன்னு கேள்வி கேட்டா, இப்போ கிச்சன்லயிருந்து பதில் வருது. "என்னடா பொண்ணு இங்கேயிருக்கு. சவுண்டு எங்கேயோ இருந்து வருதே,டப்பிங் வாய்ஸ் யார் கொடுக்கிறா"ன்னு பார்த்தா பொண்ணோட அம்மாவுக்கு காது ரொம்ப கூர்மையாம். அவங்கதான் சமையல்கட்டுல இருந்து டப்பிங் கொடுத்தது.

அந்த நேரம் பார்த்து எனது அலைபேசியில் நண்பர் ஒருவர் அழைக்க வீட்டினுள் சிக்னல் சரியாக இல்லாததால் வீட்டின் வெளியே வந்து பேசிக்கொண்டிருந்தேன். பேசி முடித்து நிமிர்ந்து பார்த்தால் அந்த தெருவே திரண்டு என்னை வேடிக்கை பார்த்து கொண்டிருந்தது. "சரியா போச்சு. நாம பொண்ணு பார்க்க வந்தா ஊரே வச்ச கண்ணு வாங்காம நம்மளை பார்த்துகிட்டு இருக்கே" என்று நினைத்தவாறு பொண்ணைத் தவிர அனைவரிடமும் பேசிவிட்டு விடைபெற்று கொண்டு வீட்டிற்கு திரும்பினோம்.

அதற்கடுத்த வாரம் இந்தோனேஷியாவில் வேலை பார்த்துக் கொண்டிருந்த எனது அண்ணனும் குடும்பத்துடன் வர அவரிடமும் கலந்து பேசி பெண் பிடித்திருப்பதாக பெண் வீட்டாருக்கு தகவல் சொல்லிவிட்டோம். எனது அண்ணன் ஒரு மாத விடுமுறையிலே வந்திருந்ததால் அவர் செல்வதற்குள் எனது திருமணத்தை முடித்து விடலாம் என எங்கள் வீட்டில் முடிவு எடுக்கப்பட்டது. பெண் வீட்டிலும் தயாராக இருந்ததால் சரி என்று சொல்லிவிட்டனர். அதற்கடுத்த வாரம் வெற்றிலை கை மாறி கல்யாணநாளும் உறுதி செய்யப்பட்டது.

திருமணம் நிச்சயிக்கப்பட்டதால் இருவரும் பேசிக்கொள்ள எனது அண்ணன் மணப்பெண்ணிற்கு ஒரு மொபைல் போன் பரிசளித்தார். மணப்பெண் அப்போது முதுகலை இறுதியாண்டு படித்து கொண்டு இருந்தார். அப்போது தேர்வு நேரம். படிப்பிற்கு தொந்தரவு இருக்கக்கூடாது என்பதற்காக தேர்வு முடிந்ததும் பேசிக்கொள்ள முடிவு செய்தோம். தினமும் தேர்வு எழுதி முடித்து வெளியே வந்ததும் போன் செய்து ஓரிரு நிமிடம் பேசுவார்.

இறுதித்தேர்வு நாள் அன்று நண்பனின் திருமணம். தாலி கட்டி முடிந்ததும் சாப்பிடக்கூட செய்யாமல் மண்டபத்திலிருந்து அவசர அவசரமாக கிளம்பிய என்னை வழிமறித்த மணமகனின் தங்கைகள் “அண்ணியை பார்க்கத்தானே இவ்வளவு அவசரமாக செல்கிறீர்கள்” என்று கிண்டல் செய்யவும் எப்படி இந்த பெண்கள் அறிந்தார்கள் என எனக்கு மிக ஆச்சரியம்.

அவர் படித்த சதக் அப்பா கல்லூரி நெல்லை நகருக்கு வெளியே தனியாக இருந்ததால் அக்கல்லூரியில் படித்த பதிவுலக நண்பர் நிலவு நண்பனோடு பைக்கில் சென்று இறங்கினேன். வழக்கம் போல தேர்வு எழுதி முடித்ததும் வெளியே வந்ததும் அவர் எனக்கு போன் செய்ய நானும் பேசிக்கொண்டே எதிரே சென்று நின்றேன்.அதிர்ச்சியும், ஆச்சரியமும் அடைந்த அவர் தோழியருக்கு பின் ஒளிந்தார். அவரது தோழியர் ட்ரீட் கேட்க அனைவரையும் நெல்லையில் சிறந்த அரசன் ஐஸ்கிரீம் பார்லருக்கு அழைத்து சென்று அவர்கள் விருப்பபட்டதை வாங்கி கொடுத்தேன்.

அன்று தேர்வு இறுதி தினம் என்பதால் அவர்கள் எல்லோரும் செட் சுரிதார் எடுக்க டவுண் செல்ல ஏற்கனவே திட்டம் போட்டிருக்கின்றனர். என்னையும் அழைக்க நானும் உடன் சென்றேன். ஆரெம்கேவி சுடி டாட் காமில் நுழைந்து கலகலக்க வைத்தவர்கள் “சரி, எங்களுக்கு ட்ரீட் கொடுத்தீங்க, கல்யாணப் பொண்ணுக்கு என்ன கிஃப்ட் கொடுக்கப்போறீங்க” என்று உசுப்பேத்த இவரோ கூலாக இருப்பதிலேயே காஸ்ட்லியான சுடிதார் ஒன்றை எடுத்து என் பர்சை பழுக்க வைத்தார்.

அதன்பின் எந்த நேரமும் எஸ்.எம்.எஸ் தான். விடிய விடிய பேச்சுதான். கடிகளாலும், கவிதைகளாலும் நிறைந்தது மொபைல் இன்பாக்ஸ்.

கல்யாணத்திற்கு ஜவுளி எடுக்க இருவீட்டாரும் போயிருந்தபோது எல்லோரும் ஆரெம்கேவியில் பட்டுபுடவை எடுப்பதில் பிசியாயிருக்க நாங்கள் இருவரும் தனியாக போத்திஸில் புகுந்து ரிசப்சன் ட்ரெஸ் எடுத்து வந்தோம். முகூர்த்தப்பட்டாக என்னை மிகவும் கவர்ந்த ஒரு மிட்டாய் ரோஸ் கலர் பட்டுப்புடவையை நான் எடுக்கச்சொல்ல மணப்பெண் உள்பட அனைவரும் மறுத்தனர். எங்கள் திருமணத்திற்கு இரண்டு மாதத்திற்கு பின் நடந்த சூர்யா-ஜோதிகா திருமணத்தில் அதே நிறத்தில், டிசைனில் ஜோதிகா முகூர்த்தப்பட்டு கட்டியிருந்ததை பார்த்து என் மனைவி உள்பட அனைவரும் வியந்தனர்.

ஒருவழியாக எல்லோருக்கும் ஜவுளி எடுத்து முடித்து நெல்லையப்பர் கோவில் எதிரில் உள்ள நெல்லை சரவணபவாவில் சாப்பிட்டு விட்டு கிளம்ப இரவு வெகுநேரம் ஆகிவிட்டது. மறுநாள் அக்கா பசங்களுக்கு பள்ளி இருந்ததால் நாங்கள் வந்த காரில் அக்காவை களக்காடு அனுப்பிவிட்டு மணப்பெண் வீட்டில் வந்த காரில் எங்கள் வீட்டில் விட்டுவிட்டு செல்வதாக கூறியதால் நாங்கள் அனைவரும் ஒரே காரில் கலகலப்பாய் கதை பேசிக்கொண்டே அம்பை திரும்பினோம்.

பவர்கட்டால் இருளடைந்திருந்த எங்கள் ஊருக்குள் கார் நுழைந்து நாங்கள் இறங்கிகொண்டு மணமகள் வீட்டாரையும் வீட்டினுள் அழைக்க மணப்பெண் எங்கள் வீட்டில் கால் எடுத்து வைக்கும்பொழுது தடைப்பட்ட மின்சாரம் மீண்டும் வந்து வீடும், ஊரும் ஒளிவெள்ளத்தில் மிதந்தது. மிகவும் சந்தோஷமடைந்த என் பெற்றோர் என்னை துபாயில் இருந்து வரும்போது வாங்கி வந்திருந்த மோதிரத்தை அவருக்கு அணிவிக்க சொன்னனர். இரண்டு இதயங்கள் இணைந்திருப்பது போன்ற அந்த மோதிரத்தை என் மனைவி அதன்பின் கழட்டியதேயில்லை.

க.பி.க தலைவர் அன்பு நண்பர் பாலபாரதி மற்றும் வருத்தப்படாத வாலிபர் சங்க உறுப்பினர்களால் கல்யாணப்பத்திரிக்கை இணையத்தில் ஏற்றப்பட்டதும் உலகமெங்கும் இருந்து நண்பர்கள் அலைபேசியிலும், மின்மடல் மூலமாகவும் வாழ்த்து மழை பொழிந்திட திருமணநாளன்று உற்றார், உறவினரெல்லாம் ஒன்றுகூடி வாழ்த்திட 12.07.2006 அன்று எங்கள் திருமணம் இனிதே நடந்து முடிந்தது.

எனது வாழ்க்கையின் இன்றியமையாத முக்கிய நிகழ்வை 150வது பதிவாக எழுதியதில் பெருமகிழ்ச்சி அடைகிறேன்.